| |
EU har funne det føremålstenleg å setje i verk eit program over fleire år (1998-2002) som tek sikte på å betre forståinga av informasjonssamfunnet og dei samfunnsmessige og økonomiske følgjene av dette. Programmet vert kalla « Promoting Information Society in Europe », forkorta til PROMISE.
EØS-komiteen vedtok den 28. mai 1999 å endre Protokoll 31 til EØS-avtala, slik at samarbeidet mellom avtalepartane vert utvida til å omfatte PROMISE.
Norsk deltaking i PROMISE vil gjere det naudsynt å løyve midlar i framtidige år. Då EØS-komiteen 28. mai 1999 tok avgjerda om å innlemme programmet i EØS-avtala, informerte Noreg difor dei andre avtalepartane om at forfatningsrettslege krav må vere stetta i Noreg før avgjerda kan verte bindande.
Den norske delen av kostnadene til PROMISE-programmet vil for 1999 utgjere om lag 1,1 mill. kroner. I tillegg kjem utgifter til nasjonal oppfølging og til den nasjonale eksperten med om lag 1,1 mill. kroner i alt. Nærings- og handelsdepartementet har ansvaret for den norske deltakinga i programmet, og midlane vert dekte over budsjettet til dette departementet. Deltakinga i PROMISE får ikkje nemnande administrative konsekvensar.
Etter Nærings- og handelsdepartementet sitt syn vil norsk deltaking i PROMISE-programmet i EU auke medvetet om informasjonssamfunnet blant innbyggjarar, verksemder og institusjonar i Noreg. Gjennom programmet vil små og mellomstore verksemder og institusjoner kunne få auka si forståing for dei utfordringar som er knytt til informasjonsteknologien og informasjonssamfunnet. Utanriksdepartementet er samd i dette.