Innst.S.nr.229 (1999-2000)
Innstilling frå samferdselskomiteen om forslag fra stortingsrepresentant Odd Einar Dørum om å åpne for at havnevesenets verdier også kan nyttes utenfor det enkelte havnedistrikt, samt å nedsette et utvalg for å få en bred gjennomgang av havneloven med sikte på modernisering og forbedring for å utvikle en effektiv logistikk, god arealutnyttelse til byutviklingsformål og en hensiktsmessig bruk av havnenes verdier og inntekter

Komiteen sine merknader

       Komiteen, medlemene frå Arbeidarpartiet, Sigrun Eng, Eirin Faldet, Gard Folkvord, Sverre Myrli, Gunn Olsen og Ola Røtvei, frå Framstegspartiet, Thore Aksel Nistad og Christopher Stensaker, frå Kristeleg Folkeparti, Rigmor Kofoed-Larsen og Jan Sahl, frå Høgre, Ellen Gjerpe Hansen og leiaren Oddvard Nilsen, frå Senterpartiet, Jorunn Ringstad, frå Sosialistisk Venstreparti, Inge Myrvoll, og frå Venstre, May Britt Vihovde, viser til vedlagd fråsegn av 23. mai 2000 frå Fiskeridepartementet i saka.

       Komiteen er samd i at havne- og farvasslova treng revisjon. Komiteen finn i samband med dette å vise til merknader i m.a Innst.S.nr.254 (1996-1997) og B.innst.S.nr.13 (1999-2000). Komiteen vil peike på den heller lange tida det har teke sidan desse merknadene låg føre til det no er teke initiativ til sette ned eit utgreiingsutval til å vurdere hamne- og farvasslova.

       Komiteen har merka seg forslaga i dokumentet. Komiteen vil likevel vise til at lovendringar i havne- og farvasslova må byggje på eit grundigare utgreiingsarbeid enn det som kjem fram av Dok.nr.8-forslaget.

       Komiteen er kjent med at arbeidet med revisjon av lova er sett i gang i Fiskeridepartementet, og at det i 1999 er gjennomført eit internt forprosjekt i departementet. Komiteen har merka seg at samansetjinga av utvalet som skal greie ut saka, er under avklaring.

       Komiteen har merka seg at økonomiske ressursar frå eit hamnedistrikt etter lov av 8. juni 1984 nr 51 om hamner og farvatn m.v. kan brukast i eit anna geografisk område. Komiteen vil ut frå dette be departementet utnytte dei moglegheiter som ligg i dagens lovverk. Komiteen har merka seg statsråden sitt svar om at gjeldande regelverk ikkje er tilpassa den situasjon som Dok.nr.8:65 (1999-2000) tek opp, og at spørsmålet aktualiserer problem som prinsipielt og praktisk har eit slikt omfang at dei bør vurderast i samband med lovrevisjonen. Komiteen er samde med statsråden i dette.

       Komiteen er kjent med at Stortinget ved behandlinga av St.meld. nr. 46 (1996-1997), jf Innst.S.nr.254 (1996-1997), slutta seg til at hamnekassa sine midlar berre kan nyttast til hamneformål. Komiteen viser til statsråden sitt svar kor han legg dette til grunn i mandatet for utgreiingsutvalet som no vert sett ned. Komiteen meiner ein må ha ei open drøfting av dette spørsmålet, på bakgrunn av at dei betydelege arealverdiar som ligg i dagens hamneareal både er skapt av hamna si verksemd og av hamnebyen sin utvikling.

       Komiteen meiner at mandatet til utgreiingsutvalet burde ha ei vidare ramme enn det departementet legg føringar for, m.a open drøfting av bruken og fordelinga av hamneområdet sine verdiar og inntekter, utvikling og forbetring av hamnelova for å utvikle ein effektiv logistikk og ei effektiv arealutnytting.