Innst.S.nr.47 (2000-2001)
Innstilling frå kommunalkomiteen om forslag frå stortingsrepresentantane Karin Andersen og Hallgeir H Langeland om å fremja ei tilleggsmelding til St.meld.nr.39 (1999-2000) om olje- og gassverksemda som skal retta spesiell merksemd på oljearbeidarane sine vilkår og på helse-, miljø- og sikkerhetsaspekt ved arbeid knytta til norsk sokkel

Merknader frå komiteen

       Komiteen, medlemene frå Arbeidarpartiet, leiaren Berit Brørby, Odd Eriksen, Aud Gaundal, Einar Johansen og Leif Lund, frå Framstegspartiet, Torbjørn Andersen og Lodve Solholm, frå Kristeleg Folkeparti, Ruth Stenersen og Anita Apelthun Sæle, frå Høgre, Sverre J Hoddevik og Erna Solberg, frå Senterpartiet, Magnhild Meltveit Kleppa, og frå Sosialistisk Venstreparti, Helge Bjørnsen, viser til at forslaget er oversendt kommunal- og regionalministeren til uttale. Ho har i brev til komiteen av 25. oktober 2000 varsla at ho vil utarbeida ei eiga Stortingsmelding om forhold knytta til helse, miljø og tryggleik for oljearbeidarar. Komiteen er samd i ei slik vurdering.

       Komiteen viser vidare til at det både frå forslagsstillarane og frå statsråden er nemnt viktige tema som bør ha sin plass i ei slik melding. Komiteen legg til grunn at det vert ivareteke. Komiteen vil elles spesielt peika på følgjande tema:

       Komiteen merkar seg at forslagsstillarane ber om ei tilleggsmelding til St.meld. nr. 39 (1999-2000), medan statsråden ser føre seg ei melding knytta til ei ny Stortingsmelding om olje -og gasspolitikken.

       Komiteen meiner at det hastar med eit sterkare søkelys på helse, miljø og tryggleik på sokkelen.

       Fleirtalet i komiteen, medlemene frå Framstegspartiet, Kristeleg Folkeparti, Høgre, Senterpartiet og Sosialistisk Venstreparti, vil difor be om at ei Stortingsmelding blir utarbeidd snarleg og slik at Stortinget kan handsama ho hausten 2001.

       Komiteens medlemmer fra Arbeiderpartiet har fått opplyst fra kommunal- og regionalministeren at en slik Stortingsmelding skal fremlegges allerede høsten 2001. Disse medlemmer mener dette er tilfredsstillende, tatt i betraktning det omfang det forventes at meldingen vil få.

       Komiteen er kjend med at det er planar om ei omlegging av beredskapen. Komiteen føreset at det ikkje i mellomtida blir gjort endringar som kan føre til ei svekking av tryggleiken. Dette gjeld både beredskapen internt på plattform og eksternt i form av fartøy og helikopter.

       Komiteen er tilfreds med at Justisdepartementet nå vil leggja fram ei Stortingsmelding om redningshelikopterberedskapen i løpet av vårsesjonen 2001, slik justisministeren signaliserte i svaret sitt på spørsmål i spørjetimen den 25. oktober 2000.

       På bakgrunn av dette vil komiteen tilrå at Dok.nr.8:90 (1999-2000) vert vedlagt protokollen.