| |
Innanfor programområde 02 Utanriksforvaltning blir det foreslått tilleggsløyvingar i samband med FNs fredsbevarande operasjonar og NATO (netto 98,555 mill. kroner) og Kronprinsbryllaupet (2 mill. kroner).
Utbetalingane til FNs fredsoperasjonar er avhengige av Tryggingsrådet sine vedtak om igangsetjing, utviding og terminering av operasjonane. På grunn av ei sterk utviding av MONUC i DR Kongo og igangsetjing av UNMEE i Etiopia/Eritrea er det behov for 106 mill. kroner i tilleggsløyving i år.
Det blir vidare foreslått ei tilleggsløyving på kr 555.000 til prosjektering m.m. av det nye NATO-hovedkvarteret i Brussel.
Innanfor budsjettet for utviklingshjelp under programområde 03 blir det foreslått omdisponeringar på til saman 127,4 mill. kroner. Desse omdisponeringane blir foreslått for å kunne nytte løyvingane mest mogeleg effektivt i budsjetterminen. Det er blitt ledige midlar til omfordeling på grunn av mindre ODA-godkjente utgifter til flyktningar i Noreg. Vidare blir utbetalingane knytta til næringslivsordningane og Den interamerikanske utviklingsgruppa mindre enn i saldert budsjett for 2001. Ymseposten på kap. 159 blir og redusert. Dei ledige midla blir i hovudsak foreslått omdisponert til humanitære tiltak i Asia og Afrika, og auka støtte til freds- og forsoningsarbeid.
Under låneordninga for utvikling av næringslivet i utviklingsland vart to lån avskrivne i 2000 utan at Stortinget er blitt orientert om dette. Enkelttiltak med avskrivningar over 3 mill. kroner skal, jf vedtak X i B.innst.S.nr.3 (1999-2000), leggjast fram for Stortinget.
Eit lån på 10,224 mill. kroner til Chain de Froid Regionale S.A i Benin vart avskrive etter at selskapet tapte heile eigenkapitalen.
Eit lån på 4,43 mill. kroner til Noraf Consulting i Uganda vart avskrive då selskapet som følgje av ulønsam drift fekk økonomiske problem og misleghelt låneavtalen med NORAD.