Nok eit avslag for kyrkjeasylant

Pakistanaren som sit i kyrkjeasyl i studentkapellet har fått sitt tredje avslag på søknaden om asyl i Norge.

Gjev ikkje opp. – Me held fram arbeidet sjølv om dette avslaget er ein knekk både for oss og for kyrkjeasylanten, seier Jon Vesterøy og Åsne Hagen i Støttegruppa for kyrkjeasylanten.
Foto: CHRISTIAN RANGEN

I det siste forsøket på å få omgjort avslaget på asylsøknaden var det lagt ved ny dokumentasjon på tortur som mellom anna var stadfesta av lege og psykolog. Men Justisdepartementet grunngjev i sitt avslag at det ikkje er dokumentert at skadane på kroppen stammar frå tortur.
– Tidlegare har ikkje departementet nemnt at det kan ha vore tortur i biletet. No erkjenner dei at at merka er der, men sår tvil om årsaka, seier Jon Vesterøy og Åsne Hagen i støttegruppa for kyrkjeasylanten.

Naive styresmakter
I svaret frå Justisdepartementet heiter det også at «man har særlig merket seg at klageren ikke har anmeldt det påståtte forholdet til pakistanske myndigheter».
– Ei slik formulering vekkjer oppsikt fordi 23-åringen sjølvsagt ikkje har tillit til politi og styresmakter i heimlandet sitt. Dette liknar mest på naivitet frå norske styresmakter si side, seier Åsne Hagen.
– Det er ikkje noko teikn på at han blir forfulgt av styresmaktene i
heimlandet, mellom anna reiste han ut med sitt eige pass utan å bli stoppa. Då burde det ikkje vere nokonting i vegen for at han
kunne melde til politiet at han blei torturert, hevdar underdirektør Frank Schjerven i Utlendingsavdelinga i Justisdepartementet.

Manglar truverd
– I denne saka er det viktigaste ei generell vurdering av søkjarens truverd. Me har vurdert det slik at denne søkjaren heilt frå starten av ikkje gjev oss opplysningar som er truverdige.
– Så de meiner at han lyg?
– Eg kan ikkje inngåande kommentere enskilde saker, men det er riktig at manglande truverd til søkjaren veg tungt i denne saka. I tillegg til dette meiner departementet at han ikkje fell inn under flyktningekonvensjonen, seier Schjerven.
Åsne Hagen og Jon Vesterøy understreker at korkje kyrkjeasylanten eller støttegruppa har gitt opp, men seier at dette er ein knekk i arbeidet. Det vil vere mogleg å anke avslaget ein gong til, men då krevst det at nye opplysningar kjem fram.
– Me dokumenterte merka på kroppen hans, men når dette ikkje er godt nok for departementet, kva er då godt nok? undrar Hagen og Vesterøy.

Ingvild Rugland
ingvild.rugland@student.uib.no