Kontrasten frå den enkle førjulsmessa i St. Jakobs
kyrkje til førjulstravle bygater er stor. Folk hastar
mellom butikkane og julegrana duvar i novembervinden. Lysa
frå butikkvindauga skin som Bethlehemsstjerna og viser
veg til kassa-apparata.
Morten Lystrup og Anne Beate Tjentland er prestar for studentane
i Bergen. Om dei klarer å vere ei motvekt til det kommersielle
i førjulstida vert dei glade. Kjøpepresset frå
butikkane er sterkt, og kommersialiseringa av jula byrja for
lenge sidan.
 |
Nattverd. Studentprest Anne Beate Tjentland deler
ut Jesu legeme under kveldsmessa i St. Jacobs kyrkje.
|
– Det kommersielle klisteret er overalt, vi vil vise
at førjulstida er noko anna enn handelsstanden sin
kjøpefest, seier Lystrup.
For mange er ikkje jula ei glad tid. I jula vert sorgen, saknet
og einsemda meir tydeleg enn ellers i året. Denne årstida
skal jo per definisjon vere ei glad tid. Difor skubber vi
unna det triste og leie, det vi ikkje vil sjå. Så
skjer ein tragedie. Eit menneske vert borte og etterlet seg
ein stol ved festbordet. Ein tom stol ved eit julepynta bord
er tommare enn det den ellers ville vore. Menneske som er
aleine vert meir aleine når alle andre gir seg over
til dei velsigningane familielivet gir.
– Jula misser ikkje innhaldet om ein ikkje er glad. Det
er lov å vere trist, sorga skal ein ha lov til å
vise, også i jula. Feiringa av det som skjedde i Bethlehem
misser ikkje innhaldet sjølv om ein ikkje er glad,
seier Tjentland. Men jula er ei tid som dei fleste ser fram
til med glede og for dei som er aleine eller i sorg vert det
naturleg ekstra hardt i jula.
– Om vi klarer å formidle lys og håp i mørketida
har vi klart noko viktig, seier Lystrup.
I St. Jakobs kyrkje tenner dei lys for håp og fred.
Små lys med sterk flamme.
Vigleik Røkke Mathisen
vigleik@mailcity.com
