Julegåve i november
Julegåva frå NSU i år er gratis kladdebøker.
I november skal dei delast ut på dei fleste lærestadene
i Bergen.
– Men treng vi meir søppel? undrar hovudfagstudenten
Elna Føleide Selle.
Etter planen skal det delast ut slike kladdebøker både
på Universitetet, NHH, Arkitektskolen og på Kunsthøyskolen.
– Det finnast allereie for mykje papir på lærestadene.
Ein organisasjon som NSU burde heller setje inn kreftene på
tiltak som er viktigare for studentane sin økonomi enn
kladdebøker, meiner Føreide Selle.
– Å arbeide for stipendordningar ein kan leve med,
er betre bruk av NSU si tid enn å dele ut kladdebøker.
Dette er jo langt i frå den største utgiftsposten
vi har, seier hovudfagsstudenten.
Med reklame
Om NSU får det som dei vil, skal det kvart semester
delast ut kladdebøker ved alle lærestadene i Noreg.
For å få råd til dette må NSU få
pengar utanfrå gjennom sponsing og reklamespots i kladdebøkene.
Dette er ikkje eit problem, meiner NSU-leiar Ine Saxvik.
– Vi diskuterer stadig sponsing i organisasjonen, fyrst og
fremst for å vete kva retningslinjer vi skal ha, seier ho.
Videre meiner Saxvik det er viktig å ha eit øyre
til kva studentane meiner.
– Om studentane meiner det er galt å satse på
sponsing, sluttar vi sjølvsagt med det, seier ho.
Søppel
Eit problem er å vete kor mange studentar som er interesserte
i kladdebøker. Til dømes skal det på Universitetet
delast ut 17.000 kladdebøker kvart semester. Difor er det
nødvendig med ein gjennomtenkt distribusjons og returordning
for at desse ikkje skal ende opp som søppel.
Leiar i Bergen-NSU, Magnus Jensen, er klar over problemet.
– Det siste vi vil gjere er å forsøple. Difor
vil vi sørge for å ha ei skikkeleg ordning for returbøker,
slik at desse ikkje vert liggjande og flyte, seier Jensen.
Dermed er det berre å vente på NSU-julenissen, som
kjem tidleg i år.
Vigleik Røkke Mathisen
vigleik@mailcity.com
Kladdebokkontrovers
NSU-sentralt i Oslo er på fullstendig kollisjonskurs
med lokallaget i Tromsø. Deira syn på reklamefinansiering
har skapt opprørsstemning i ishavsbyen.
Då avtalen med sponsing og reklamespots i kladdebøker
vart gjort kjend, gjorde Tromsø-NSU det klart at dette
var noko dei ikkje ville vere ein del av. Dei er prinsippmotstandarar
av reklame.
Likevel gjekk NSU-sentralt vidare med forhandlingane.
– Dette er total overkøyring og overstyring av lokallaget
meiner Torbjørn Nygaard, landsstyrerepresentant frå
Tromsø-NSU.
Leiinga i NSU er derimot opptekne av å skape ro rundt
saka og lite interesserte i diskusjon.
– Landsstyret har godkjent avtala. Vi forheld oss til det,
seier leiar i NSU Ine Saxvik til Studvest.
Retningslinjer for framtidige økonomiske avtalar vil
bli drøfta på NSU sitt landsstyre om ei veke.
|
