Krev munnkorg

Velferdsstyret er lei av at enkeltpersonar i Student-skipnaden (SiB) uttaler seg om politiske saker til pressa. No vil dei forby dei tilsette å snakka med mediene.

KONTROLL. Leiar i velferdstinget Arild Helgøy vil ha full kontroll over dei tilsette i SiB. Foto: MARGRETE AADANES

– Dersom SiB skal framstå med tyngde og gjennomslagkraft er vi nøydd til å sameina uttalingane våre. Dette er den einaste måten vi kan påverka politikken på, seier leiar i velferdsstyret Arild Helgøy.
SiB er studentane sin eigen velferdsorganisasjon. Det er SiB som mottek semesteravgifta.

Vinglete om bustader
Helgøy meiner at SiB lenge har hatt problem med å stå fram med ei meining i ulike enkeltsaker, men at dette har vorte særleg tydeleg den siste tida.
– Vi har særleg hatt vanskar når det gjeld det som har med bustader å gjera. Medarbeidarar i SiB har uttalt seg om desse problema i Studvest, seier Helgøy.
Til dømes uttalte ein medarbeidar i SiB at studentane i Bergen var kresne fordi dei ikkje vil bu på Fantoft (Studvest nr. 18).
Helgøy presiserer at dei tilsette har lov til å uttala seg i reint praktiske spørsmål, men altså ikkje koma med meiningsytringar. Han understreker at han ikkje ønskjer å kritisera dei SiB tilsette.
– Eg er overtydd om at medarbeidarane har handla i beste meining, og ikkje har meint å gjera noko gale. Dessutan er dei SiB-tilsette sjølv representerte i styret, og såleis er dei med på å bestemme korleis dei skal forholda seg til pressa, seier han.

Gammalt vedtak
Velferdsstyret og SiB treng ikkje å laga nye reglar for å ordna opp. Vedtektene i SiB seier klårt at all
informasjon til pressa skal gå gjennom administrerande direktør og styreleiar.
– Det vi manglar er rutinar på korleis vi skal greie å overhalda
reglane våre. Vi må klargjera kor grensa går mellom det å vera praktisk og politisk, seier Helgøy.
Onsdag for to veker sidan vedtok eit samrøysta velferdsting å kalla inn SiB-direktøren til eit møte der dei skal sjå nærare på problema.

Kristin Jansen
Kristin.jansen@student.uib.no