Fotballgal outsider

Skuleåret ‘97–’98 studerte Lin Åm biologi i Manchester. Der vart idéen om å skrive engelsk hovudfagsoppgåve om supportarane til Manchester United fødd.

fotballdame. Lin Åm tar hovedfag i United. Foto: Anniken C. Mohr

Lin Åm sit i baren på The English Pub. Kledd i Beckham-skjorte er ho klar til å sjå Manchester United spele mot Leicester.
– Eg har vore United-supportar sidan ungdomsskulen. På mange måtar er eg ein outsider som har kome innanfor fan-miljøet. Den umiddelbare definisjonen av United-supportarar er nemleg menn frå arbeidarklassen busett i Manchester-området, seier ho.
Og på innsida er det sikkert at Lin er komen. Ho har akkurat fått ein artikkel om hovudfagsoppgåva på trykk i månadens nummer av bladet United-supporteren, noko som ikkje er alle unnt.

«Oss» mot «dei»
Tittelen på oppgåva er Oss mot dei. – Ei studie av fotballtilhengjaridentitet, med referanse til Manchester United.
– Eg ønskjer å ta for meg kva kriterium som gjer at supportarane formar eit «oss» og på den måten definerer seg som gruppe til forskjell frå «dei andre». I tillegg vil eg sjå på om fotball-supportarar vert rekna som kultur eller subkultur, noko som sjølvsagt avheng av korleis ein definerer desse begrepa, seier Lin.
– Eg tykkjer forresten det er morosamt å kunne jobbe med hobbyen min på heiltid i eit år, og då på Universitetet si rekning, legg ho til.

«Hooligans» og vald
I arbeidet med oppgåva fortel Lin at ho er avhengig av å nytte ulike kjelder. Fleire supportarar gir ut eigne blad i forbinding med Manchester United, og desse gir ikkje nødvendigvis uttrykk for dei same haldningane. I tillegg er det skrive fleire bøker om emnet.
– Det finst òg ein del sosiologiske studium om fotballtilhengjarar, men desse fokuserer omlag berre på såkalla «hooligans», seier ho.
Lin legg til at «hooligans» representerer ein slags motkultur i supportermiljøa, og at dei difor er spesielt interessante for sosiologar.
– Sjølv tykkjer eg «hooligans» og vald får nok merksemd som det er, og ønskjer difor å konsentrere meg om supporter-massen som eit heile. «Hooligans» er trass alt i mindretal blant fotballtilhengjarane.
Utradisjonelt?
Lin fortel at nokre av dei eldre professorane ved Universitetet tykkjer emnet ho skriv om er noko vulgært, og at det høyrer til populærkulturen.
– Men mange av dei har likevel uttrykkt at det er fasinerande, seier ho.
Som avslutning oppmodar Lin flest mogleg om å ta kontakt dersom dei har tips eller tilbakemeldingar å kome med.

Torunn Todal Laberg
torunn_todal_laberg@hotmail.com