Studentane har det bra

Studentane ved UiB er godt nøgde med lærestaden sin.
Både undervisinga og service-tilboda får skryt i Studentbarometeret som blir lagt fram i dag.

trivsel Ingrid og Margreta Gjøstein trivst på Universitetet, men syns lufta på lesesalen er tung og dårleg. Foto: rune tokle

Heile 80 prosent av dei som deltok i undersøkinga vil råda andre til å velja Universitetet i Bergen som studiestad. Rektor Kirst Koch Christensen er svært nøgd med resultatet.
– Studentbarometeret stadfestar at dei som har studert ei stund trivst godt. Dette er eit svært gledeleg resultat, men det er og viktig at vi blir flinkare til å ta imot dei heilt ferske studentane våre, seier ho.
Undersøkinga viser og at dei aller fleste syns dei får den informasjonen dei treng både på fakulteta og på Studentkontoret. Omlag 85 prosent av studentane meiner at dei får forventa hjelp når dei tek kontakt med Studentkontoret. Mest nøgde er studentane ved Mat.nat. med heile 92 prosent.

Fekk mange svar
Kristofer Henrichsen ved Forskings- og utdanningsavdelinga har vore svært engasjert i arbeidet med Studentbarometeret. Han er gledeleg overraska både over resultata og den høge svarprosenten i undersøkinga.
– Vi hadde ein forventa svarprosent på 35, håpa på at vi skulle få 50 og fekk svar frå heile 57 prosent av dei som vi sende ut spørjeskjema til. Dette er vi svært glade for, seier Henrichsen.

Fleire undersøkingar
Henrichesen ønskjer å ha undersøkingar om studenttrivsel som eit fast opplegg kvart tredje år.
– Slik det er no har vi ingen faste standarder å måla resultata opp mot. Difor hadde det vore nyttig å ha fleire undersøkingar i åra framover. Men dette er det opp til Det akademiske kollegium (DAK) å avgjerda, understreker han.
Kirsti Koch Christensen på si side kan ikkje lova fleire studentbarometer.
– Eg vil korkje seia det eine eller det andre. Slike undersøkingar er som kjend ikkje gratis, seier ho.
Det er Norsk gallup som har gjennomført Studentbarometeret for Universitetet. Undersøkinga er ein del av eit større prosjekt, institusjonsevalueringa, der alle dei norske universiteta er med.

Kristin Jansen
Kristin.jansen@student.uib.no

. . . men lufta er for dårleg

Trass i at studentane er gjennomgåande tilfredse, er det to ting som er for dårlege; lufta på lesesalen og bruk av IT i undervisinga.

Berre 26 prosent av psykologistudentane, 27 prosent av SV-studentane og 28 prosent av odontologistudentane er nøgde med den lufta dei pustar inn på lesesalen. På dei andre fakulteta er tala noko
høgare, men heller ikkje der finn ein særleg tilfredse studentar.
På lesesalen på Stein Rokkans hus sit søstrene Ingrid og Margreta Gjøstein. Dei kjenner seg godt igjen i skildringar av dårleg luftkvalitet.
– Eg vil helst sitja nær eit ope vindauge, og det er jo ikkje så lett når det er vinter og kaldt ute, seier Margreta.
Både Ingrid og Margreta er einige om at lufta vert dårlegare di meir folk som kjem for å lesa. Verst er det midt på dagen og i eksamensperioden.
– Eg trur det er mykje gammalt støv som ligg her, og virvlast opp ut på dagen, seier Ingrid.
Når det gjeld bruk av Internett i undervisinga er det studentane på medisin, odontologi og psykologi som har det verst. Under 20 prosent av desse er nøgde med det tilbodet dei får. Studentane på HF og SV er dei som meiner at dei har det best.
Ingrid og Margreta trur at bruk av Internett i undervisinga er heilt avhengig av kva fag ein går på.
– Inntrykket mitt er at bruk av Internet i undervisinga varierer veldig frå fag til fag. Hitorie og Sam.pol. har svært flinke til dette, men eg veit og om fag som ikkje brukar Internett i det heile teke, seier Margreta.
Rektor ved UiB, Kirsti Koch Christensen, lovar at ho vil sjå nærare på det studentane ikkje er nøgde med. I juni skal Studentbarometeret diskuterast i Det akademiske kollegium.

Kristin Jansen
Kristin.jansen@student.uib.no