Overskot i NSU

NSU sitt landsting kunne i helga presentere eit overskot på 260.000 kroner, etter at dei sidan 1998 har hatt samla underskot tilsvarande 550.000 kroner.

Etter ein periode med store overskridingar, var NSU-leiar Ine Saxvik tydeleg stolt over å kunne presentere eit overskot på over 260.000 kr, då ho entra podiet for å presentere det reviderte budsjettet. Innsparingane er dels gjorde ved å redusere kostnadar i sentralleddet og å minke stønaden til lokallaga. Dei tidlegare underskota har gjort eit
grovt innhogg i eigenkapitalen.

Har kutta støtte
Det er likevel med delt glede dei gjennomfører desse innsparingane
– Det er heilt klart at det er mange områder i NSU som skulle hatt mykje meir pengar enn dei får i dag, men det heile er eit spørsmål om hard prioritering. Vi ser det som svært viktig for NSU å bygge opp att eigenkapitalen til organisasjonen, sa Ine Saxvik frå talarstolen.
Eigenkapitalen i NSU skal ideelt sett vere stor nok til å halde for eit års drift. Dei vil difor halde fram med å stramme livreima dei komande åra. Trass i at støtta frå staten har auka frå 750.000 til 1.000.000 kroner og tilskotet frå samskipnadane har auka frå 38 til 40 pr student, minkar NSU sine inntekter jamt og trutt i takt med prisstiging og lønnsauke.
NSU har i dag ei omsetjing på rundt 6.000.000 kroner årleg.

Ingen økonomisk opptur
NSU er likevel ikkje i i nærleiken av noko som kan kallast ei berekraftig utvikling. Innsparingane medfører vesentlege kutt i kostnadane ved sentralleddet. Det medfører igjen lågare aktivitet, aldrande utstyr og dårlegare medlemstilbod.
I budsjettkommentaren blir det understreka at sparinga vil gå på bekostning av NSU sitt organisasjonsarbeid.

Grunde Grimstad
grunde@grimstad.as

Ny leiar frå Oslo

Trond Larsen frå Oslo vert ny leiar i NSU etter han hårfint vann over Arnt Ove Hovden frå UiB. Dermed braut han det to år lange Bergens-hegemoniet i leiarstolen.

GLAD: Den nye leiaren i NSU, Trond Larsen, var godt nøgd etter valet.

Larsen er 26 år og statsvitar, og har gått gradene oppover i organisasjonen. Han meiner han har eigenskapar som vil kome NSU til gode. Mellom fanesakene hans er sikring av fri rett til høgare utdanning gjennom studentvelferd og studiefinansiering.
– Så du er einig med Mjøsutvalet?
– Mjøsutvalet si instilling inneber ei stor reform, og har mykje bra og ein del mindre bra. At den satsar på kvalitet i undervisinga og auka studiefinansiering likar eg svært godt, seier Larsen.

Mindre mangfald
Meir skeptisk er han til den gjennomgåande effektivitetstankegangen i innstillinga, som han meiner kan gå ut over mangfaldet i undervisinga, og difor studiekvaliteten. Han trur det då vert mindre rom for dei som må eller vil bruke lenger tid, fordjupe seg i materien og/eller lese sekundærlitteratur.
– Kvifor er norske studentar dei minst produktive i Europa?
– Det er ikkje nødvendigvis negativt at studentane er lenger i systemet. Men fyrst og fremst må det vere systemet det er noko gale med, og ikkje noko ein kan klandre studentane for, meiner han.
– Er det negativt for Bergensstudentane at du ikkje er frå Bergen?
– Eg trur ikkje det har så mykje å seie kvar eg kjem frå. Eg er her for å gjere ein jobb for studentane i heile landet, seier den nye leiaren.

Saker i systemet
Mange saker ligg enno i systemet for utreiing. Både spøsmålet om stenging av fag på universiteteta og den planlagte samanslåinga av NSU og Studentenes Landsforbund (StL) treng vidare utreding før det kan takast ei endeleg avgjerdsle.
I dag organiserer NSU studentane ved universiteta og dei vitskaplege høgskulane, medan StL femner om dei andre statlege høgskulane og dei private høgskulane. Dei to organisasjonane er omlag jamstore. Ein stor samlande organisasjon kan tidlegast verta endeleg vedteke på neste landsting og vil i så høve vere verksam frå og med 1. juli 2002.