Droppar Studentradioen

Måndag kveld vedtok Velferdstinget at dei ikkje lenger vil eiga Studentradioen. I staden skal den gjerast om til stifting, og ikkje lenger utgjera ein fast post på budsjetta til Velferdstinget.
– For å overleva må Studentradioen vere merksame på kva studentpolitikarane trur at studentane vil ha, seier nestleiar i Velferdsstyret, Eivind Kildal. Han meiner studentradioen er for dyr i drift i høve til kva studentane får att for han, samstundes som det ikkje er aktuelt for Velferdstinget å gå inn og detaljstyra Studentradioen. Om Studentradioen ikkje får dei midla dei heretter må søkje om, meiner Kildal dei kan finansiere drifta si med reklame eller radiobingo. Redaktør i Studentradioen, Kristine Magnesen (biletet), meiner handsaminga av saka har gått for fort, og ho tykkjer ikkje det er morosamt at politikarane tek så lett på Studentradioen sin økonomi.

Slaktar seg sjølve

– Studentrådet er heilt utan reell makt, og liknar mest av alt eit supperåd.
Det seier Arild Helgøy (biletet), som leiar Bergen Liberale Studentlag og har fleire års fartstid i studentpolitikken. NSU-leiar Brynjar Torgersen er langt på veg einig i kritikken. Studentrådet skal fungera som studentane sin interesseorganisasjon, og vel mellom anna representantar til Det Akademiske Kollegium (DAK) som er Universitetet sitt høgste organ.