18.5.2005
Kibsgaard valt inn i Universitetsstyret
Gry Kibsgaard skal representere gruppe C, teknisk/administrativt tilsette, i Universitetsstyret frå hausten 2005.
Av Hilde K. Kvalvaag
– Eg ønsker å gjere det tydelegare at vi i gruppe C også er med på å produsere forskning, utdanning og formidling gjennom å legge til rette for denne verksemda, seier Kibsgaard til På Høyden når vi fortel henne at ho er valt til nytt styremedlem.
Gry Kibsgaard, som er forskningskonsulent på Odontologisk fakultet, vant valet i gruppe C med stort fleirtal. 382 teknisk/administrativt tilsette nytta stemmeretten av 1223 med stemmerett. Parat-lista der Gry Kibsgaard stod som nummer ein, framfor tre andre kandidatar, fekk 216 stemmer. I tillegg fekk ho 26 førstestemmer utanom Parat-lista.
– Den største utfordringa ved å representere gruppe C er at det er ei veldig mangesidig gruppe, her er alt frå tekniske stillingar til direktørar. Det har også komme til uttrykk i den lave valdeltakinga i gruppa, meiner Kibsgaard. Ho vil arbeide for at heile gruppa kjenner seg som ein del av universitetssamfunnet på lik line med andre, og at alle har same tilgjenge på elektronisk informasjon.
Vararepresentantar for gruppe C blir Kristine Breivik, Gunnar Torsnes og Kjell Trengereid i den rekkefølgja. Kjell Trengereid fekk flest førstestemmer av desse med 79, mot 31 for Breivik og 24 for Torsnes. Dei to sistnemnde kom likevel føre Kjell Trengereid som vararepresentantar fordi dei stod på samlingslista til Parat som fekk 216 stemmer.
|
Skriv ut artikkelen
Kommentar til redaksjonen
Tips en bekjent om denne saken
