|
|
|
 |
|
28.11.2001
Opprettar eiga utdanningsavdeling
Det skal opprettast ei eiga utdanningsavdeling ved UiB. Større merksemd om undervisnings- og utdanningsoppgåvene og tilpasning til den forestående kvalitetsreforma er blant dei viktigaste årsakene til at dette vert gjort.
Av Hilde Kvalvaag Bang
Også opprettinga av utdanningsutvalet til Kollegiet og prorektoratet for utdanning tidlegare i år, gjer det naturleg å vurdere behovet for ei administrativ tilpassing, heiter det i saka som vert lagt fram til orientering for Kollegiet torsdag 29. november.
Den nye utdanningsavdelinga skal utgå frå Forskings- og utdanningsavdelinga. Avdelinga skal organiserast i to seksjonar; Seksjon for studietenester og Seksjon for studiekvalitet. Til saman vil dei to seksjonane ha 25 tilsette frå det noverande personalet. Senter for etter- og vidareutdanning (SEVU) vil følgje med til den nye avdelinga.
Frå nyttårDet er særleg studentrelaterte oppgåver for Internasjonalt kontor ved Forskingsavdelinga, og oppgåver knytt til studieinformasjon og studentrekruttering ved Informasjonsavdelinga som ligg tett opp til ansvarsområdet for den nye Utdanningsavdelinga.
To andre norske universitet har "reine" utdanningsavdelingar. Eit anna døme på slik organisering er "Studerandeenheten" ved Lunds universitet i Sverige.
Arbeid med felles tenester retta mot studentar og studieadministrative spørsmål på sentralt nivå ved UiB høyrer i dag i hovudsak inn under Forskings- og utdanningsavdelinga som blei oppretta 1.1.1996. Ein slo då saman Forskingsadministrativ avdeling og Studieadministrativ avdeling. No vel ein altså igjen å skilje administrasjonseiningane for forsking og utdanning. Etter planen skal delinga skje frå 1. januar. Avdelingsdirektør Kristen Haugland vil fungere som direktør for både Forskingsavdelinga og Utdanningsavdelinga inntil utdanningsdirektør vert tilsett. Stillinga vert truleg utlyst med det første.
|
|
|
|
Skriv ut artikkelen
Kommentar til redaksjonen
Tips en bekjent om denne saken
