Mål og innhald

Emnet gjev ei innføring i musikkterapeutisk samspel, altså musikalske samspelsformer som kan fungere sosialt i brukssituasjonar som er aktuelle i musikkterapien. Det er tre hovudkomponentar i emnet: Samspel i aktuell besetning i studentgruppa, Bandsamspel og Musikkteknologi og utstyr.

Samspel og arrangering for aktuell besetning i studentgruppa

Kurset fokuserer på samspel, repertoarkunnskap, arrangering og komponering. Samspel og arrangering tar utgangspunkt i aktuelle besetningar i studentgruppa, både for at studentane skal få høve til å bruke sine hovudinstrument og for at dei skal få røynsle med og dugleik i å arrangere for varierte besetningar og genre. Sentrale målsetjingar for kurset er at studenten skal utvikle eigen musikalitet og musikkfaglege forståing og lære å arrangere og komponere for brukssituasjonar som kan vere relevante i musikkterapeutisk praksis.

Bandsamspel

Emnet gjev kompetanse i ulike populærmusikkgenrer, innføring i grunnleggjande instrumentdugleik på bandinstrument (bass, slagverk, gitar, keyboard, piano og song) og erfaring med samspel og samarbeid i band og andre ensemble. Det meste av undervisninga vil være praktisk-metodisk retta, men der vil også vere eit kortare teorikurs og eit pensum som kan setje samspel inn i nokre relevante teoretiske samanhengar.

Musikkteknologi og utstyr

Kurset skal gje studentane ei grunnleggjande innføring i musikkteknologi og utstyr, med vekt på forsterkarutstyr, miksepultar og bandutstyr, opptaksutstyr, datateknologi og programvare.

Læringsmål

Etter fullført kurs er det forventa at studentane har tilegna seg grunnleggjande kompetanse i samspel, arrangering og musikkteknologi, med særleg vekt på allsidig samspelskompetanse og genreforståing, slik at dei kan nyttiggjere seg undervisninga på andre musikkrelaterte emne i studiet, delta musikalsk i praksisundervisninga på studiet og kvalifisere seg til å engasjere menneske i helsefremjande musikalsk praksis.

Undervisningssemester

Undervisninga startar i vårsemesteret (4. semester i normalprogresjonen).

201

Tilrådde forkunnskapar

Tilrådde forkunnskapar inkluderer teoretisk og praktisk dugleik i musikk minimum tilsvarande godt avgangsnivå for musikklinje på vidaregåande skule. Praktisk dugleik i musikk må omfatte hovudinstrumentdugleik og bruksmusikkompetanse på eit akkompagnementsinstrument. Breidde i høve til (bi)instrument og sjangerkunnskap er ein fordel.

Undervisning og omfang

Undervisninga blir gitt i form av praktiske øvingar, gruppearbeid og forelesingar. Det er viktig at undervisninga blir sett i samanheng med dei arbeidsmåtar som studentane møter i praksis. Det er forventa at studenten deltar aktivt i undervisninga, gjennom musisering i undervisningstimane og gjennom framlegging og utprøving av eigne arrangement og komposisjonar. Det er vidare forventa at ein kan arbeide med såkalla "rotasjon", der studentane vekslar mellom å spele ulike instrument under utprøving og gjennomspeling av arrangement. Det blir lagt vekt på at studentane sjølve analyserer og diskuterer det som skjer i undervisninga og at dei ut i frå eit teoretisk grunnlag tileignar seg ei kritisk og analytisk haldning til musikkterapeutisk samspel og arrangering.

Obligatoriske arbeidskrav

All undervisning er obligatorisk og omfattar kurs i arrangering og samspel, med utgangspunkt i aktuell besetning i studentgruppa, kurs i bandsamspel og kurs i musikkteknologi og utstyr. Obligatoriske aktivitetar omfattar innlevering av minst tre øvings-, arrangements-, og komposisjonsoppgåver. Det blir forventa at studentane sjølve etablerer og driv band og/eller samspelsensemble og at dei opptrer med desse i relevante samanhengar, som t.d. huskonsertar på musikkterapistudiet. Det er ein føresetnad at alle obligatoriske aktivitetar er gjennomførte og godkjende før eksamen. Fråvær på meir enn 20 % fører normalt til tap av eksamensrett.

Vurderingsformer

Samspelseksamen i gruppe på 4-6 studentar, 30-35 minutt. Alle studentane skal:

• leie minimum ein av dei aktivitetane eller samspelsarrangementa gruppa vel å framføre
• dokumentere musikalsk breidde ved å vere aktiv på minimum tre instrument (hovudinstrument og sjølvvalde biinstrument, derav stemme og eit bandinstrument)
• ha arrangert eller komponert minimum eitt av arrangementa.

Kvar student legg fram ei kort skriftleg orientering, med oversyn over eksamensprogram og dei ulike roller studenten har i høve til dei ulike komponentane.

Intern sensur. Vurderingsuttrykk: Greidd/Ikkje greidd.

Læremiddelomtale

Pensum er på ca. 200 sider. Eiga pensumliste blir utarbeidd.

Emneevaluering

Det blir gjennomført evaluering i form av spørjeskjema. Ein skriftleg rapport blir utarbeidd.