Mål og innhald

TOLKHF kombinerer ei teoretisk og praktisk tilnærming til tolking. Undervisninga i teoridelen tek opp sentrale kommunikasjonsteoretiske problemstillingar som er relevante for tolkeverksemda. Det blir særleg lagt vekt på tolkeetikk med sikte på å gjere studentane medvitne når det gjeld teieplikt og nøytralitet. Studentane skal vidare tileigne seg kunnskap om tolken sine plikter og rettar.

Den praktiske delen av studiet vil ta for seg tolketeknikk og gi ei innføring i ulike tolkemetodar med hovudvekt på dialog- og konsekutivtolking. Studentane vil få trening i tolking, samt i minne- og notatteknikk.

Undervisningssemester

Haust. Orienteringsmøtet i veke 33 er spesielt viktig å få med seg for å få informasjon om emnet sine særeigne prosedyrar kring semesterregistrering, og for å få utdelt undervisningsmateriell som førebuing til undervisningsstart i veke 35.

Studienivå

Bachelor

Krav til studierett

Emnet er ope for alle med ein studierett ved UiB.

NB. Det er avgrensa opptak til TOLKHF. Du søkjer via Studentweb ved å undervisningsmelde deg. Frist for undervisningsmelding er onsdag i veke 34.

Om det er fleire søkjarar enn plassar, vil følgjande søkjargrupper bli prioriterte:

1. Studentar på Bachelorprogrammet i språk og interkulturell kommunikasjon.

2. Andre studentar med 45 studiepoeng på 100-nivå i det valde framandspråket. Studentar som har norsk som andrespråk og som ikkje har eksamen frå norsk vidaregåande skole, må ha fullført 45 studiepoeng frå norsk/nordisk høgare utdanning i tillegg til dei 45 studiepoenga i framandspråket.

Om emnet blir fullteikna, vil opptak av gruppe 2 skje på grunnlag av karaktersnittet i framandspråket.

Emnet har eige opptak med andre fristar enn ved vanleg semesterregistrering. For meir informasjon, kontaktstudierettleiar@if.uib.no eller studieveileder@if.uib.no

Krav til forkunnskapar

Studentane må ha minimum 45 studiepoeng i valt framandspråk på bachelornivå ved opptak. Språkval kan variere frå år til år. Studentar som har norsk som andrespråk og som ikkje har eksamen frå norsk vidaregåande skole, må ha fullført 45 studiepoeng frå norsk/nordisk høgare utdanning i tillegg til dei 45 studiepoenga i framandspråket.

Undervisning og omfang

Undervisninga har form av seminar. Den teoretiske delen av kurset har fellesseminar for alle studentane. Den praktiske delen blir delvis gjennomførd i mindre grupper med rollespel, kasusstudium, studiebesøk og øvingar i tolketeknikk. Det blir forventa aktiv deltaking i gruppene. Tid for eigne øvingar er også ein del av undervisninga. Opptak av eiga tolking, kasusstudium eller besøk i offentleg sektor dannar grunnlag for refleksjon over tolking, eller eigne prestasjonar.

Omfanget av emnet er 24 timar seminarundervisning, 36 timar øvingar og 16 timar eigne øvingar.

Obligatoriske arbeidskrav

Det er obligatorisk frammøte på seminara. Studentane må vere til stades på minst 75% av seminara.

Studentane skal levere inn ei obligatorisk oppgåve i form av ein refleksjonstekst basert på observasjon av ein reell tolkesituasjon, eller på videoopptak av eiga tolking for å kunne ta eksamen i emnet. Notatet skal vere på om lag 1200 ord.

For å kunne gå opp til eksamen må studentane ha fått godkjent dei obligatoriske arbeidskrava som er nemnd under Obligatoriske arbeidskrav. Dei obligatoriske arbeidskrava er gyldige til og med det neste undervisningssemesteret.

Vurderingsformer

Skriftleg del: Ei oppgåve på to veker som tek for seg tema frå tolkeetikk. Oppgåva skal skrivast på framandspråket og skal vere på om lag 2400 ord. Resultata frå den skriftlege delen er gyldige til og med neste undervisningssemester.

Munnleg del: Dialogtolking (notat er tillatne) mellom norsk og tolkespråket av ei samtale relatert til offentleg sektor. Tolkinga er maksimum 30 minutt.

Den skriftlege og den munnlege delen tel 50% kvar.

Karakterskala

Ved sensur av emnet nyttast karakterskalaen A-F, der F er stryk. Det blir gitt ein eksamenskarakter for den skriftlege delen og ein for den munnlege delen. Begge karakterane skal komme fram på karakterutskrifta i tillegg til den samla karakteren. Den skriftlege og den munnlege delen tel 50% kvar.

Læremiddelomtale

Sjå separat pensumliste.

Undervisningsstad

Bergen

Emneevaluering

Undervisninga blir evaluert i tråd med UiB sitt kvalitetssikringssystem.