Haustraps og haustrybs til matolje og proteinfôr

Arne Oddvar Skjelvåg

Rapsblomar Foto: Arne Oddvar Skjevåg

Desse vekstane har fått auka interesse som kjelde til matolje og til proteinfôr i økologisk landbruk. Dyrkingsområdet i Noreg er avgrensa, og overvintring er kritisk for å lykkast. IPM har eit prosjekt i lag med Bioforsk, der ein følgjer plantane med detaljerte observasjonar frå såing om hausten og heilt fram til mogning neste sommar. Formålet er å finna dei kritiske vilkåra for vekst, utvikling, overvintring og mogning.

Feltforsøk er i gang på UMB, Bioforsk (Trøndelag og Toten) og Sveriges lantbruksuniversitet kjem med i 2007. Observasjonar vert gjorde av bladdanning om hausten og våren, tidspunkt for knoppsetting, blomstring, avblomstring og mogning utetter vår og sommar. Desse observasjonane skal setjast i samband med vêrobservasjonar for å finna funksjonelle samanhengar mellom ymse vêrfaktorar og utviklingsfart.

Det vert lagt særleg vekt på overvintring. Både kulden plantane er utsette for, og tida i frosen eller ufrosen tilstand tærer på evna til å tola låge temperaturar og den vekstkrafta plantane har til kvar tid. Plantar skal difor takast inn til fleire tider gjennom vinteren. Det vert da testa kor låge temperaturar dei toler før dei døyr, og andre plantar vert sette i vekstkammer for å måla vekstpotensialet deira ved kvar inntakstid.

Studentar som ønskjer å vera med på dette arbeidet, vil få ta del i nokre av observasjonane gjennom veksetida og om vinteren. Største arbeidsoppgåva vert å leggja til rette data, analysera dei og skriva sjølve mastergradoppgåva.

Rettleiar
Arne Oddvar Skjelvåg
tlf. 64 96 56 11 (kontor), 907 85 137 (mobil)
e-post: arne.skjelvag@umb.no

Oppdatert: 01.01.07
Utskriftsvennlig versjon : Arkiv : Tips en venn