Høgskulen i Volda har om lag 3000 studentar og 300 tilsette og er organisert i 4 avdelingar og eitt forskingsinstitutt: Avdeling for kulturfag, Avdeling for humanistiske fag og lærarutdanning, Avdeling for samfunnsfag og historie, Avdeling for mediefag, og Ivar Aasen- instituttet. I tillegg er Nasjonalt senter for nynorsk i opplæringa lagt til høgskulen. Det vert gitt undervisning innafor ei rekkje fagområde og yrkesretta utdanningar. Høgskulen driv forsking og utviklingsarbeid og satsar på forskaropplæring og kompetanseoppbygging for tilsette i samarbeid med universitet i inn- og utland.
___________________________________________________________________
Engasjement som Fredskorpsdeltakar (St. nr. 23/08)
Har du lyst på eit utfordrande, lærerikt og spanande arbeidsår i Kenya?
Kort om bakgrunn:
Ved Høgskulen i Volda, Avdeling for samfunnsfag og historie, Institutt for sosialfag er det ledig 1 års engasjement som Fredskorpsdeltakar frå september/oktober 2008. Høgskulen i Volda har inngått partnarskapsavtale med Fredskorpset om utveksling av to deltakarar frå Volda til Nairobi, Kenya og to deltakarar frå Nairobi til Volda. Samarbeidet mellom Høgskulen i Volda og partnaren i Kenya: Mathare Youth Sports Association (MYSA), er utvikla gjennom prosjektet ”Playback” som vart initiert av musikkgruppa Merkesteinane i Volda og Mathare Youth Sports Association (MYSA) i Nairobi i 2005. Utvekslinga skal bygge på gjensidige relasjonar og gjere det mogleg for menneskje med liknande fagbakgrunn eller interesse å lære av kvarandre og skape kompetanseheving i verksemdene på begge sider.
Arbeidsområde:
Deltakaren skal ha sitt arbeid innan organisasjonen Mathare Youth Sports Association (MYSA) i Mathare slummen i Nairobi, Kenya. Arbeidsoppgåvene er mangfaldige og vil m.a. dreie seg om å ta del i innsamling av data kring situasjonen for målgruppa: barn og unge med ulike funksjonshindringar. Vidare skal deltakaren hjelpe til i arbeidet med å utvikle musikalske og sosiale aktivitetar generelt for barn og unge og saman med vertsdeltakarane hjelpe til med rettleiing av målgruppa. Deltakaren skal ta del i vertsorganisasjonen sin tilrettelegging og organisering av workshops og seminar, samt fremje informasjon om målgruppa sine rettar.
Ønskelege kvalifikasjonar:
Søkjar må ha relevante fag for oppdraget (sosialfag, lærarutdanning med fordjuping i pedagogikk, spesialpedagogikk, musikk, forming, kunst/handverk eller kroppsøving), og det er ønskeleg med utdanning på bachelornivå. Andre relevante utdanningar kan etter særskilt vurdering vere aktuelle. Det er elles ønskeleg at deltakaren har interesser og ferdigheitar innan ei eller fleire musikalske greiner (t.d. korsong, rytmisk musikk, dans). Spelar du eit instrument vert det sett på som ein fordel.
Søkjar må vere open for ny læring, ha gode tilpassingsevner, vere fleksibel og tolerant og å beherske engelsk (skriftleg og munnleg). Søkjar skal vere mellom 22 og 35 år.
For stillinga gjeld:
Løn og godgjering i samsvar med Fredskorpset sine standardreglar for Nord-Sør programmet. I tillegg vert bustad (husleige, straum, vatn) i Nairobi, forsikring og reise dekka. Den tilsette må ta del i eit 3 veker førebuingskurs før utreise i regi av Fredskorpset i Oslo. Etterarbeid ved Høgskulen i Volda: vidareformidle kompetanse.
Fullstendig prosjektskildring kan du få ved etterspurnad. Informasjon om Fredskorpset sine utvekslingsprogram finn du på http://www.fredskorpset.no/no/Fredskorpset/Organisasjonen.
Kvalifiserte søkjarar med tilknyting til Høgskulen i Volda vil ha fortrinn til stillinga.
Vi ber om at søknaden vert levert elektronisk og om at du gir opp referansar i søknaden. Det er link til elektronisk søknad på www.hivolda.no/stilling. Aktuelle kandidatar vil bli bedt om
å ettersende rettkjende kopiar av attestar og vitnemål.
Søknadsfrist 1. juni 2008.
Nærare opplysningar om stillinga kan ein få ved å kontakte Avdeling for samfunnsfag v/ prosjektleiar Ingun Klepp tlf. 70 07 51 96 / 950 66 008.
Det vert teke atterhald om budsjettmessig godkjenning frå Fredskorpset om vidareføring av prosjektet i 2008/2009.