Filosofi - master

Beskrivelse av studiet

Oppbygging av studiet:
Mastergradsprogrammet i filosofi er bygd opp av tre obligatoriske emne på 20 studiepoeng, filosofiens natur, filosofi og samtidsaktuelle tema og sjølvvalt emne, og ei masteroppgåve på 60 studiepoeng.

Progresjon i studiet:
Vi rår studentane til å arbeide med oppgåva parallelt med at dei tar dei obligatoriske emna dei tre første semestera og konsentrerer seg heilt om oppgåva det siste semesteret. Arbeidet med oppgåva bør ein kome i gang med i samarbeid med rettleiaren alt frå første semester. I dette semesteret tar ein difor Sjølvvalt emne.  

Oppbygging av studiet

Hva lærer du?

Etter fullført studium og oppnådd grad skal studentane ha desse læringsresultata:

Kunnskapar og forståing:

• Kunnskap innan og om dei klassiske og sentrale moderne områda i filosofien.
• Forståing av komplekse fenomen i samtida, som til dømes ytringsfridomen sin betydning og grenser eller grunnlaget for rettvis fordeling av rettar og gode.
• Høgt refleksjonsnivå og ei sjølvstendig og sjølvkritisk haldning til filosofiske problem og freistnader på problemløysing.

Ferdigheiter:

• Sjølvstendig og sjølvkritisk haldning til tekstmateriale og filosofiske framstillingar av problemområde.
• Kunne vurdere ulike sider ved filosofiske teoriar slik at det kan tene som grunnlag for vidare arbeid med filosofiske problem på eit vitskapeleg nivå.
• Kunne undervise i filosofi på eit elementært nivå, dvs. til examen philosophicum, examen facultatum og i vidaregåande skule.

Kompetanse:

• Grundige og omfangsrike fagkunnskapar innafor filosofifaget som ein kan gjere bruk av i møtet med andre fag og emne.
• Arbeide sjølvstendig, analytisk og kritisk med filosofiske emne og sette desse inn i større samanhengar og problemkompleks, også i forhold til andre fagområde.
• Evne til å kunne formidle fagleg innhald både munnleg og skriftleg på eit høgt fagleg og språkleg nivå.

Opptakskrav

For opptak til masterstudiet i filosofi krev ein avlagd bachelorgrad med ei fordjuping på minimum 80 studiepoeng i filosofi eller tilsvarande. Fordjupinga skal ha ein gitt studieprogresjon. Det blir sett eit fagleg minstekrav for opptak på karakteren C, som blir rekna ut frå eit gjennomsnitt av karakterane i fordjupingsemna.

Undervisning og eksamen

Undervisningsformer:
Undervisninga blir gitt i form av førelesingar og seminar. I større grad enn ved bachelorstudiet forventar ein aktiv deltaking frå studentane.

Eksamen og vurdering:
Eksamen består hovudsakleg av heimeeksamen. Ved mastergradseksamen vil det òg vere munnleg eksamen.

Undervisnings- og eksamensspråk

Norsk.

Utveksling

Masteroppgåva må ein ta ved Institutt for filosofi og førstesemesterstudier, men ein kan ta filosofiemne ved samarbeidsuniversiteta til instituttet. Instituttet tilrår at ein tar utanlandsopphald tidleg i studiet. Godkjenning av utanlandsstudie skjer etter søknad.

Jobbmuligheter

Studiet kvalifiserer for arbeidsoppgåver som set krav til refleksjon og analytisk tenking, arbeid med å formulere føresetnader og trekke konsekvensar, sjå problem og moglege løysingar, evne til å orientere seg kritisk og sjølvstendig, og som inneber skriftleg framstilling av kompliserte grunngjevings- og årsaks- og verknadssamanhengar. Slik kompetanse har også overføringsverdi i forhold til andre felt.

Desse kvalifikasjonane vil gjere ein eigna for arbeid innafor kultur og samfunnsliv, arbeid ved museum, bibliotek, forlag, i statleg og kommunal forvaltning, privat næringsliv, utgreiingsarbeid og undervisning.

Med mastergrad i filosofi i kombinasjon med andre undervisningsfag på bachelornivå er ein formelt kvalifisert for undervisning i vidaregåande skule.

Lektorutdanning:
Dersom ein har bachelorgrad med eit skulefag i tillegg til filosofi, som grunnlag for mastergraden, vil ein med mastergrad etter å ha tatt praktisk-pedagogisk utdanning heiltid eller deltid (60 stp.), bli lektor i filosofi med eitt fag i tillegg.

Videre studier

Under gitte karakterkrav kvalifiserer ein mastergrad i filosofi for opptak til ph.d.- programmet i filosofi og eventuelt andre fag.

Studieplan

Studieplan-Master-i-filosofi-H-2015