To statsrådar til HSF denne veka

Kunnskapsminister Øystein Djupedal og Arbeids- og inkluderingsminister Bjarne Håkon Hansen kjem til Sogndal og Leikanger torsdag den 11. januar.

Dei vil m.a sjå på arbeidet med NAV-reforma og HSF sitt omfattande samarbeid med NAV.

Nedanfor følgjer det notatet som høgskulen har sendt Kunnskapsdepartementet på førehand:

Samarbeid mellom Høgskulen i Sogn og Fjordane og NAV

Høgskulen i Sogn og Fjordane sitt samarbeid med NAV gjeld fleire område. Høgskulen tilrettelegg både eigne kurs og ordinære studium for å møte behov i samband med NAV-reforma. Høgskulen er engasjert i rådgjeving og utviklingsarbeid mot ulike delar av NAV-systemet, og me har forskingsprosjekt som rettar seg mot det som skjer ved innføringa av NAV. Høgskulen ser det som ei viktig oppgåve å bidra til kompetanseutvikling i NAV og følgja opp det gode samarbeidet me i fleire år har hatt med velferdsetatane.

Tilrettelegging av studium og kurs

Høgskulen i Sogn og Fjordane har fleire ordinære studium som er relevante for velferdssektoren. HSF har såleis bachelorstudium i sosialt arbeid, i barnevern og vernepleie. Ved desse studia har me i ei årrekkje utdanna sosialarbeidarar som i dag er å finna i kommunar og NAV-organisasjonen på regionalt nivå.

HSF utdannar også leiarar og merkantilt personale for velferdssektoren. Såleis har HSF eit masterstudium i organisasjon og leiing med valretning innan helse- og sosialleiing, ei eittårig vidareutdanning i helse- og sosialadministrasjon og eit bachelorstudium i økonomi og administrasjon der studentane kan ta profileringsemne i offentleg organisering og leiing og økonomistyring i offentleg sektor.

Ved dei ordinære studia våre ser me det som viktig å ha personale med oppdatert kunnskap om NAV-reforma, og å tilretteleggje pensum og undervisning for å fange endringane i velferdssektoren.

HSF har også utvikla fleire tverrfaglege kurs spesielt for velferdssektoren, som vidareutdanning i rettleiing, psykisk helse og rusproblematikk (alle på 60 studiepoeng). Studiet Serviceorientert brukarsamhandling vart utvikla og utprøvd i 2000-2002 i nært samarbeid med Fylkestrygdekontoret i Sogn og Fjordane. Det vart vidareutvikla til Servicestudiet, ei deltidsutdanning for tilsette i velferdssektoren og andre som ønskte å auke kompetansen i kommunikasjon. Så langt er det utvikla to emne i studiet: Kommunikasjon og service og Ta pulsen på språket, begge på 15 studiepoeng. Til saman har nærmare 100 arbeidstakarar i Sogn og Fjordane teke eit eller begge emna, og tilbakemeldingane er svært gode. Arbeidet med Servicestudiet har vore leia av ei styringsgruppe med representantar frå fylkestrygdekontoret, Aetat, Skatteetaten, KS og Høgskulen i Sogn og Fjordane.

Høgskulen har òg eit nyutvikla kurs som er skreddarsydd for den nye velferdsetaten: NAV – Organisasjon og leiing i eit omstillingsperspektiv (30 studiepoeng). I samråd med leiinga i NAV Sogn og Fjordane er oppstart av studiet utsett til hausten 2007. Tilbodet vert lyst ut med minst dei fire Vestlandsfylka som nedslagsfelt.

Forsking om velferdssektoren

I tillegg til utdanning driv høgskulen med forsking som er relevant i denne samanhengen. Organisasjon og leiing med fokus på helse- og velferdsleiing er eit av dei prioriterte fou-områda for HSF i strategiplanperioden 2006-2010, det same er profesjonsforsking.

Frå Norges forskingsråd fekk HSF i 2006 ei løyving på seks millionar kroner til det strategiske høgskuleprosjektet "Lokal velferdsleiing i system under press". Saman med eigne midlar gjev dette oss ei ramme på rundt 10 millionar til forsking på helse- og velferdssektorane. Det strategiske høgskuleprosjektet skal gå over fire år, 2007-2010. NAV vil bli invitert til å delta i referansegruppa for dette høgskuleprosjektet. Bakgrunnen for prosjektet er dei store nasjonale styringsutfordringane innanfor helse- og sosialsektoren. Desse utfordringane gjer at det lokale leiarnivået i sektoren vert stilt overfor store krav og sprikande mål med omsyn til omstilling og utvikling, samordning og prioritering, kostnadseffektivitet og kvalitet. Eit eige delprosjekt skal setje søkjelyset på vilkåra og mulegheitene for lokal leiing i NAV. I delprosjektet vil me analysere dei strategiane leiarane utviklar for å takle dei målkonfliktane, samordningsproblema, kompetanseutfordringane og kulturskilnadene som ligg latent i organisasjonsmodellen (NAV). Konkret vil me studere korleis dei balanserer leiingsstrategiar i spenningsfeltet mellom ei generalist- eller hybridtilnærming og meir fagspesifikke orienteringar. Det vil også bli lagt vekt på å studere korleis leiarane tolkar og handlar i høve til institusjonelle rammevilkår. I kva grad og på kva måte evnar leiarane å utnytte eventuelle opningar for å utvikle lokale organisasjonsmodellar basert på lokal kunnskap og lokale behov?

HSF har også i gang forsking retta mot dei særleg utfordringane ved små sosialkontor, ei forsking som framover kan rettast inn mot dei nye velferdskontora. HSF ynskjer retta forskinga både inn mot saksbehandlar- og leiarnivået i etaten.

Rådgjeving og utviklingsarbeid

HSF har på ulike måtar erfaring i rådgjevings- og utviklingsarbeid for velferdssektoren. For tida deltek me med kompetanse for eit utviklingsprosjekt innan barnevernet i Sogn. Me har også delteke i utviklingsprosjekt for Rikstrygdeverket sentralt i samband med overgangen til NAV. Gjennom Rettleiingsnettverket i Sogn og Fjordane er fagfolka våre engasjerte i samarbeid med profesjonsutøvarar frå praksisfeltet, særleg i velferds- og utdanningssektorane

Det siste året har høgskulen hatt fleire møte med partane i den nye NAV-organisasjonen lokalt, regionalt og nasjonalt, for å sikra at høgskulen kan følgja opp behova i etaten. 31. mars 2006 hadde me møte med trygd, Aetat, Fylkesmannen og sosialtenesta for å drøfta kompetansebehovet i den nye etaten. Etter etableringa av NAV har høgskulen hatt eit møte med leiinga i NAV Sogn og Fjordane (4.10.2006) og NAV Fylkesforum (12.12.2006) for å presentera kva me kan tilby og drøfta kva NAV treng av kompetanse. På neste møte i NAV Fylkesforum, den 16.1.2007, skal dette følgjast opp ved at deltakarane i fylkesforumet kjem med sine innspel om kompetansebehov. Høgskulen skal òg vera med på dette møtet.

NAV Sogn og Fjordane har uttrykt at dei ynskjer at høgskulen deltek i prosessane omkring oppretting av seks nye NAV-kontor i 2007. Høgskulen ynskjer å bidra med rettleiing, utdanningstilbod og forsking på dei områda me har den rette kompetansen, både til NAV Sogn og Fjordane og til NAV i andre fylke.

Sist endra av: Berit Amundsen, 08. januar 2007 15:44:27
Publisert av: Berit Amundsen, 08. januar 2007 15:41:43