Bø årets kulturkommune i Norge
Høgskolemiljøet blei understreka som medverkande faktor da kulturminister Valgjerd Svarstad Haugland onsdag offentleggjorde at Bø er kåra til Norges kulturkommune 2005. Bø har markert seg med allsidig innsats for kulturlivet gjennom samarbeid, kreativitet og nytenking.
Gjennom høgskolemiljøet har kommunen fått nye utfordringar som den har utvikla til beste for både eigne innbyggjarar og for studentane som får si utdanning der, siterte kulturministeren frå juryens grunngjeving.
- Det tradisjonelle kulturuttrykket blir tatt vare på og blir vidareutvikla samtundes som det blir gitt tilbod innanfor nyare kunst og kulturformer, heiter det vidare i grunngjevinga.
Av eit budsjett på 150 millionar kroner brukar Bø kommune ni millionar til kultur.
- Hovudtanken bak kåringa av Norges kulturkommune er å få fram dei goda eksempla og gi ros til dei som fortener ros. Prisen blir gitt til ein kommune som i den seinare tida i særskilt grad har markert seg med ein allsidig innsats for kulturlivet gjennom samarbeid, kreativitet og nytenking, sa Valgjerd Svarstad Haugland.
Juryen peikar på at befolkninga i vinnarkommunen har tilbod på ein rad gode kulturarenaer og at den får rom for utvikling av talent på de høgst ulike område. Kommunen har mellom anna utøvara på nasjonalt nivå både innan idrett og ulike musikkformer, heiter det i jurygrunngjevinga.
I Bø kommune med sine vel 5100 innbyggjarar er dei rundt 1400 studentane ved Høgskolen i Telemark sin studiestad i Bø ein markert del både i dagleglivet og i dei mange kulturaktivitetane - også utanom den landskjente Kroa i Bø som studentane driv.
