Ulovleg kopiering og etterlikning av produkt, idear og varemerke vil auke i åra framover, sa norske næringslivsleiarar i 2004. Ei ny undersøking gjev dei rett. Patentstyret arbeider for at bedriftene skal få meir kompetanse om industrielle rettar, og bruke desse rettane, slik at dei står sterkare rusta til å handtere dette problemet.

I 2004 sa 32,4 % av bedriftene i norsk næringsliv at dei hadde opplevt å bli kopierte eller etterlikna. I 2006 hadde talet stige til 34,2 %. Det vil seie at over 136 000 norske bedrifter har opplevt å bli kopierte eller etterlikna.

Spesielt utsette er eksportbedrifter. Over halvparten av dei har vore ute for at konkurrentar har kopiert produkta eller varemerka deira. Dermed taper dei inntekter og marknadsdelar, og det går ut over innteninga til bedrifta og dekninga av utviklingskostnadene.

Kraftfulle konkurranseverktøy

–  Patent, varemerkeregistrering og designregistrering er kraftfulle beskyttelsesverktøy, som gjer det enklare å slå ned på kopiering av teknologi, varemerke og design, seier direktør Jørgen Smith i Patentstyret. Registrerte rettar kan òg skremme dei som vil prøve seg på kopiering.

- Strategisk bruk av industrielle rettar er eit verktøy som kan medverke til at innovasjon lønner seg, både for den einskilde bedrifta og for norsk næringsliv. Einerettssystema patent, varemerkeregistrering og designregistrering må difor setjast på dagsordenen i styret i den einskilde bedrifta. Gjennom informasjonsmøte, kurs, foredrag og anna informasjonsarbeid ynskjer Patentstyret å auke denne kompetansen i norsk næringsliv.

Ingen bransjar slepp unna

Undersøkinga viser heilt klart at problemet gjeld langt fleire enn dei vi høyrer mest om: programvare-, mote-, musikk- og filmbransjane. Teknikk, design, namn og logoar blir etterlikna og kopierte i tilknyting til varer og tenester, som såpe, eigedomsmekling, finansiell verksemd, arkivskåp, bakarvarer, farmasi, leiker, møblar, mobiltelefonar, turartiklar, trevirke, vin, forsikring og sjokolade.

Både norske og utanlandske konkurrentar etterliknar dei attraktive produkta og kjenneteikna til norske bedrifter.

Meir informasjon hos

direktør Jørgen Smith
direktetelefon: 22 38 74 90, mobil: 45 00 05 30, e-post:

Relaterte saker:

For å auke kontrollen med import av piratkopiar føreslår Finansdepartementet å endre tollova. Forslaget går ut på at tollstyresmaktene skal kunne varsle innehavarar av immaterielle rettar dersom det er mistanke om at varer som blir innførte, krenkjer rettane deira. Finansdepartementet føreslår òg at tollstyresmaktene i slike tilfelle skal kunne halde varene tilbake i inntil fem dagar.
Høyringsfristen var 12. februar. 
 Lovforslaget og høyringsfråsegnene kan lesast på heimesida til Finansdepartementet: