Norsk næringsliv sikrar seg stadig oftare einerett til designen på produkta sine. I 2005 fekk Patentstyret 25 % fleire søknader om designvern frå norske bedrifter. Når investering i design har stor samanheng med lønnsemd, er det viktig å sikre seg einerett.

– Dette er ei svært gledeleg utvikling etter nokre år med gradvis nedgang i talet på søknader frå norske bedrifter, seier Jørgen Smith, direktør i Patentstyret. – Designregistrering gjev dokumentert einerett til utforming av produkt. Det er eit viktig strategisk verkemiddel som bedriftene har for å slå ned på ulovleg kopiering og sikre inntening av utviklingskostnader. Framleis er det mange bedrifter i Noreg som kan og bør vurdere dette verkemiddelet.

Auken i designsøknader kan forklarast med den positive økonomiske utviklinga generelt, og med meir merksemd omkring industrielle rettar i næringslivet, i verkemiddelapparatet og i bransjeorganisasjonar. Patentstyret satsa endå meir på informasjonsarbeid i 2005, med lunsjmøte, foredrag og kurs både i og utanfor Patentstyret. Aktivitetar, mellom anna Norsk Designråds kampanje «Design underveis », som Patentstyret var med på hausten 2004, kan òg ha påverka utviklinga i 2005.

Norsk Designråd arbeider for at norske bedrifter skal ta i bruk design som strategisk verkemiddel, og ser at norsk næringsliv har oppdaga at design kan vere utslagsgjevande for konkurransekrafta til bedriftene. Ei undersøking som Norsk Designråd har fått utført, viser at 8 av 10 norske bedriftsleiarar meiner det er eit klart positivt forhold mellom investering i design og lønnsemd.

– Både tala frå Patentstyret og undersøkingar viser at norsk næringsliv no er på rett veg når det gjeld å forvalte og ta vare på den økonomiske verdien som design skaper, seier administrerande direktør Jan R. Stavik i Norsk Designråd.

Ei norsk bedrift som har teke designvern inn i strategiane sine, er Ulstein. Den banebrytande designen på ankerhandteringsfartøyet X-BOW blir omtala som sikrare, meir økonomisk, energisparande og meir behageleg enn tradisjonelle fartøy. Ulstein X-BOW er kåra til Årets ingeniørbragd av lesarane av Teknisk Ukeblad.

Ulsteinkonsernet meiner design vil bli viktig i åra framover, dei ser industrielle rettar som eit viktig verkemiddel. Difor vart skroget til fartøyet designregistrert hos Patentstyret i januar 2006. Dei tre første fartøya skal leverast til reiarlaget Bourbon Offshore Norway i mai.

Informasjon om annan aktivitet i Patentstyret i 2005 finn ein i Årsrapporten 2005.

Media kan kontakte desse personane:
Direktør Jørgen Smith, Patentstyret
Dir. tlf. 22 38 74 20, mobil 45 00 05 30,

Administrerande direktør Jan R. Stavik, Norsk Designråd
Dir. tlf. 23 29 25 56, mobil 97 54 59 78,