UDI innkallar formidlingsorganisasjonane for au-pairordninga for ein gjennomgang. - Vi må ta påstandane om misbruk av ordninga alvorleg, seier assisterande direktør i opphaldsavdelinga i Utlendingsdirektoratet (UDI), Morten Hansen.

Ulike presseoppslag gav påstandar frå ulikt hald om at au-pairar blir utnytta. Dette var både påstandar om at dei ikkje får den lønna dei har krav på etter regelverket og at mange jobbar meir enn avtalen går ut på.

UDI har ikkje fått konkrete meldingar om slikt misbruk av ordninga. Gjennomgangen med formidlingsorganisasjonane vil blant anna handle om kvaliteten på kontraktane som blir inngått og om det er nødvendig med ei strengare regulering av ordninga.

Au-pair-ordninga er ein europeisk avtale om kulturutveksling, som Noreg har slutta seg til. I fjor kom 1 021 au-pairar til Noreg.