Flest kjem til Noreg på grunn av familie

Også i 2004 utgjorde utlendingar som har nære familierelasjonar i Noreg den største gruppa av personar som kom til landet. Talet familieinnvandrarar held seg høgt, sjølv om færre får løyve til sameining med flyktningar etter at reglane vart skjerpa inn i 2003, seier direktør Trygve G. Nordby i Utlendingsdirektoratet (UDI).

Fleire enn i fjor

I 2004 blei det gitt 12 800 løyve til personar som søkte om familieinnvandring, 2 300 fleire løyve enn i 2003, då det blei gitt 10 500 løyve. 38 prosent av løyva blei gitt til menn. Stadig fleire av dei som kjem til Noreg på grunn av familieinnvandring blir sameint med norske borgarar. Dei ti landa det kom flest søkjarar frå i fjor vik ikkje mykje frå 2003, sett bort frå at Thailand og Irak har bytt plass. (Tal for 2003 i parentes):


Thailand	1100 (780)
Irak	917 (940)
Russland	742 (797)
Somalia	682 (652)
Tyskland	563 (401)
Pakistan	497 (518)
Storbritannia	454 (330)
Filippinene	438 (396)
USA	422 (322)
Tyrkia	418 (445)

Kortare saksbehandlingstider

Interne omorganiseringar fører nå til at UDI kjenner seg betre rusta til å behandle søknader om familieinnvandring i framtida. Frå og med 1. desember i fjor blei det etablert ei tredje eining for familieinnvandring. Det betyr at tre einingar nå behandlar søknader om familieinnvandring. Sjølv om ikkje fleire personar er sett til å arbeide med behandling av søknader om familieinnvandring, har ein i endå større grad enn før sett på korleis ein fordelar søknadene om familieinnvandring mellom seg avhengig av frå kva land søknadene kjem frå. Utover i 2005 ventar ein å sjå resultat av denne omlegginga.