Om lag 2600 asylsøkjarar fekk innvilga asyl eller ei anna form for opphald i Noreg i 2006 etter asylbehandling eller som overføringsflyktningar. Over halvparten av asylsøknadene som blei realitetsbehandla i 2006 blei innvilga.
- Vi registrerer at fleire av dei som kjem til Noreg som asylsøkjarar har behov for vern. Det var i fjor ein større del av asylsøkjarane som fekk vern eller opphald i Noreg samanlikna med tidlegare år, seier direktør Ida Børresen.
Større del får vern og opphald i Noreg
57 prosent av asylsøkjarane som fekk sakene behandla i 2006, fekk opphaldsløyve. Det er 12 prosentpoeng fleire enn i 2005, og 16 prosentpoeng fleire enn i 2004. I 2006 fekk rundt 1050 personar vern, mens i overkant av 600 personar fekk opphald på humanitært grunnlag.
I tillegg blei det i samarbeid med UNHCR innvilga vern til nær 950 overføringsflyktningar. Dermed fekk om lag 2600 personar vern eller opphald på humanitært grunnlag i Noreg i 2006.
Større del kvinner får vern
70 prosent av kvinnene som fekk asylsaka si behandla i 2006 fekk opphaldsløyve i Noreg. Det er ein auke på sju prosentpoeng samanlikna med året før. For menn var tilsvarande del 50 prosent, ein auke på 13 prosentpoeng samanlikna med 2005.
Flest personar frå Somalia får løyve
Det blei innvilga opphaldsløyve til 330 asylsøkjarar frå Somalia i 2006. Deretter følgjer Russland (325), Irak (290), Eritrea (220) og Afghanistan (160).
