Barnevernfagleg rettleiing

Studieinnhald

Vidareutdanninga er eit samarbeid mellom Høgskulen i Sogn og Fjordane og Høgskulen i Volda.

Du lærer om

• teoriar og modellar for rettleiing
• aktuell forsking og utvikling på rettleiingsfeltet
• relasjon, kommunikasjon, refleksjon og utvikling på individ-, gruppe- og organisasjonsnivå
• barnevernet som lærande fellesskap og som ein arena for læring og utvikling
• rettleiing av nyutdanna og nytilsette i barnevernet

Utdanninga er sett saman av to emne à 15 studiepoeng:

• Rettleiingspedagogikk og eiga rolle som rettleiar
• Profesjonell rettleiing for nyutdanna og nytilsette i barnevernet

Det blir arbeidd med å få dei to emna formelt godkjende som emne på masternivå, og som valfrie emne i masterstudia Samhandling innan helse- og sosialtenester ved HiSF og Meistring og myndiggjering ved Høgskulen i Volda.

Studieplan

I studieplanen for 2014 - 15 finn du informasjon om korleis studiet er bygd opp, oversikt over emne, pensum med meir. Les den!

Studieplan for 2015 - 16 blir publisert rundt 15. mars.

Undervisningsmåtar

Du lærer gjennom forelesingar, gruppearbeid, rettleiing (individuelt og i gruppe), sjølvstudium og skriftleg arbeid. Både munnlege framleggingar og skriftlege arbeid er obligatorisk.

I kvart emne er det fire samlingar à tre dagar. Mellom samlingane vil det vere rettleiingsarbeid på arbeidsplassen og i lokale nettverksgrupper. Delar av teoriundervisninga, rettleiinga og tilbakemeldinga kan bli tilbydd digitalt.

Opptakskrav

Følgjande krav må vere oppfylt:

• Utdanning som barnevernspedagog, sosionom, vernepleiar (minst 3 år) eller innan anna relevant fagområde. I særskilde tilfelle kan opptak gjerast på grunnlag av realkompetanse.
• Minst 3 års praksis i minimum 50 % stilling frå barnevernet etter fullført utdanning
• Arbeide i barnevernet i studietida