Tilrettelegging og helse
Som student har du tilbod om ulike helsetenester. Dersom du har du ei funksjonsnedsetting, dysleksi, psykiske lidingar/vanskar eller anna, kan du ha rett på tilrettelegging.
Vi kan hjelpe deg med ulike typar tilrettelegging for å gi deg ein best mogleg studiekvardag.
Helsetilbod gjennom Studentsamskipnaden
Som student ved HiSF har du ulike helsetilbod du kan nytte deg av gjennom Studentsamskipnaden (SISOF):
- Helsekasse som kan gi støtte til mellom anna helseutgifter og tannlege
- Ulukkesforsikring
- Helsestasjon som gir råd om helse, prevensjon med meir
- Psykososial rådgivingsteneste, psykologteneste og studier med støtte (sjå under)
Tilrettelegging i studiet
HiSF har som eit overordna mål å tilretteleggje studietilbod og studiesituasjon på ein slik måte at flest mogleg kan gjere seg nytte av studietilboda våre.
Dysleksi/lese- og skrivevanskar
Du som har dysleksi eller lese- og skrivevanskar kan få hjelp både i studiekvardagen og ved eksamen.
Eksempel på tilretteleggingstiltak:
- Tilrettelegging ved eksamen
- Diagnostisering (testar)
- Hjelp til søknad om hjelpemiddel som skrivestøtteprogram, talesyntese, få delar av pensum som lydbøker frå NLB med meir
- Korrekturlesing av større oppgåver
- Betre studieteknikk
Psykiske vanskar
Som student er du velkommen til samtale om det du måtte ha på hjarta, gjennom SISOF si psykososiale rådgivingsteneste. Du kan komme med små og store problem. I samarbeid med Helse Vest og Helse Førde har SISOF også eit psykologtilbod for studentar.
Studier med støtte (sms) gir studentar med psykiske vanskar faglege og sosiale moglegheiter til å nå studiemåla sine. Sms er eit samarbeid mellom Studentsamskipnaden, HiSF og Nav. Som deltakar i sms er du med på å utarbeide ein individuell handlingsplan tilpassa din situasjon.
Nedsett funksjonsevne, syns- eller hørselshemming
Studentar med nedsett funksjonsevne ved HiSF skal ha dei same moglegheiter som andre til å komme seg til og frå høgskulen, delta på forelesingar, i gruppearbeid, ta eksamen, bruke biblioteket, kantina, uteareal og velferdstilbod.
Nokre av tiltaka ved HiSF for å oppnå dette:
- Bygga våre er tilrettelagt for rullestolbrukarar (med unntak av Guristova)
- MOBILARM (varsel om brann) er installert i alle bygg
- Undervisningsrom er utstyrt med teleslynge
- Trapper og toalett er merka for blinde/svaksynte
- Studentsamskipnaden har hyblar som er universelt utforma
