Den raude Rhododendron 'Junifeuer' blomstrar seint

Foto: Egil Ingvar Aune

Anlegget var i utgangspunktet ein privat hage anlagt av ekteparet Anne og Halvor Svinvik. Arbeidet med arboretet starta i 1943, og var på 1960-talet ein av dei største samlingane av tre og busker som privatpersonar har klart å skape i Noreg. I 1971 donerte ekteparet Svinvik eigedommen med heile plantesamlinga til Vitskapsmuseet i Trondheim som no er ein del av NTNU (Noregs teknisk-naturvitskaplege universitet).

Staden fungerer som eit minnesmerke over det to privatpersonar med interesse, entusiasme og pågangsmot klarte å skape, og blir dessutan bruka til prøvedyrking av uvanlege planteslag for å sjå korleis dei klarer seg under dei klimatilhøva vi har i denne delen av landet.

Svinviks arboret er ope for publikum i sommarsesongen (frå midt i mai til sist i august), og er ein av dei største turistattraksjonane på indre Nordmøre.