Eit informasjonssamfunn for alle
Vegen til eit betre velferdssamfunn
Informasjonssamfunnet blir i stadig større grad ein føresetnad
for velferdssamfunnet. IKT effektiviserer offentlege tenester – IKT aukar
produktiviteten i landet. Derfor er også digital kompetanse i befolkninga, gode
offentlege elektroniske tenester og føreseielege rammevilkår heilt sentrale
element for at Noreg framleis skal vere verdas beste land å bu i.
IKT er i sin natur grenseoverskridande og grip inn på alle
sektorar og samfunnsområde. Er det berre ein vilje til koordinering, gir dette
store moglegheiter for gevinstar ved samordna utnytting av samfunnets felles
ressursar. Dette bør skje gjennom eit godt samarbeid mellom privat og offentleg
sektor, mellom innbyggjarar og myndigheiter, og mellom menneske med ulike evner
og ressursar. Slik kan vi få til ei meir effektiv utnytting av offentlege
ressursar, ei fornying og effektivisering av offentleg sektor og betre tenester
til innbyggjarar og næringsliv. Slik kan vi oppretthalde og fornye eit
konkurransedyktig næringsliv og heve den allmenne og digitale kompetansen i befolkninga.
Det er gjennom eit godt samarbeid at vi løftar kvarandre, at vi skaper
økonomisk vekst, opprettar nye arbeidsplassar
Vilje til tverrpolitiske initiativ, til å ta del i ein
heilskapleg IKT-politikk – til samarbeid – gir ei meir effektiv utnytting av
samfunnets felles ressursar og betre tenester for innbyggjarane og
næringslivet. Opne standardar og kjeldekodar er eitt døme, ein felles
IKT-arkitektur i det offentlege er eit anna – mens eit samarbeid mellom
offentleg og privat sektor for å auke kompetansenivået i befolkninga er eit
tredje.
At den felles utviklinga skal vere inkluderande og omfatte
alle, er meir enn ei hjartesak for regjeringa, det er tvingande nødvendig. Nye
arbeidsplassar, økonomisk vekst og auka velferd er avhengig av forsking og
offensiv næringspolitikk, men også av konstant fokus på digital inkludering –
tilgang for alle, kompetanse hos alle – og ei universell utforming av alle
digitale løysingar og tenester.
Kommenter meldinga:
