Sámi dieđalaš áigečála lea sámegiel máŋggafágalaš dieđalaš áigečála mii almmuha dieđalaš artihkkaliid, girjeárvvoštallamiid ja doavttirlogaldallamiid sámi servodaga, kultuvrra, giela, historjjá ja eará sámi ja eamiálbmogiid guoski fáttáid birra. 2015 rájes almmuhit maiddái fágalaš muitosániid. Áigečállaga almmuhit Sámi allaskuvla ja UiT Norgga árktalaš universitehta Sámi dutkamiid guovddaš ovttasbarggus. Dan váldoruhtadeaddjin lea Norgga dutkanráđđi. Vuosttaš nummar ilmmai 1994:s, ja 2007 rájes leat jahkásaččat almmuhuvvon guokte nummara.
Sámi dieđalaš áigečála lea Norggas dohkkehuvvon almmuhankanálan mii addá 2. dieđalaš dási čuoggáid, ovdamearkka dihte Cristin-vuogádagas. Cristin lea dutkanbohtosiid registrerema diehtovuođđu. Eanet dieđut leat Database for statistikk om høgre utdanning ruovttusiidduin.
Sámi dieđalaš áigečállaga doaimmahusgoddi bovde čálliid sáddet dieđalaš artihkkaliid ja eará namuhuvvon čállosiid Sámi dieđalaš áigečállagii. Boahtte nummara sisasáddema áigemearri lea borgemánu 31. b. 2015. Artihkkalat galget čállot man nu sámegillii, ja dat eai galgga leat jorgaluvvon eará gielain. Artihkkalat galget hábmejuvvot dárkilit Sámi dieđalaš áigečállaga čállinrávvagiid mielde. Artihkkalat sáddejuvvojit doaimmahusčállái.
Sámi dieđalaš áigečállaga čuovvovaš sisasáddenáigemearit leat:
Borgemánu 31. b. 2015
Guovvamánu 29. b. 2016
Dieđalaš artihkkaliid ja eará namuhuvvon čállosiid sáhttá sáddet sisa miehtá jagi.