|
Takk, Emil J. Samuelsen, for kommentar!
Det stemmer at "spørjeordslause" mengdespørsmål av typen "E du gammel?" er vanlege òg i trøndersk, altså spørsmål der ein forventar ein kvantitet som svar snarare enn ja eller nei trass i at det har lik syntaktisk form som eit ja/nei-spørsmål. Øyalf Endresen har skildra dette for trøndersk i ein artikkel i Maal og Minne i 1985, sjå her for fullstendig referanse. To år seinare skreiv Tove Bull eit tillegg (også i Maal og Minne) der ho trekkjer fram at spørjemåten er utbreidd også i nordnorsk og der ho gjer greie for nokre skilnader på detaljnivå mellom trøndersk og nordnorsk (fullstendig referanse). Konklusjonen frå desse to artiklane er at spørjemåten truleg finst i eit samanhengande område frå Trøndelag og nordover: Endresen nemner også at han har fått stadfestingar på konstruksjonen frå Sunnmøre.
I det pågåande prosjektet Nordisk dialektsyntaks (sjå http://uit.no/scandiasyn/) undersøkjer vi no for det første om spørjemåten finst utanfor trøndersk/nordnorsk og for det andre om det verkeleg er utbreidd i heile det nordlege området.
Ei anna og nyare litteraturtilvising der fenomenet på ein interessant måte vert sett i ein meir teoretisk lingvistisk samanheng, er elles denne artikkelen av Peter Svenonius og Christopher Kennedy. Der trekkjer forfattarane m.a. ein parallell til islandske mengdespørsmål, noko vi attgir i vår populærvitskaplege artikkel i Labyrint.
Øystein A. Vangsnes & Curt Rice
|