Sisaváldingáibádusat - sisabeassančoavdagat

Oppalaš lohkangelbbolašvuohta lea sisabeassančoavdda alit ohppui. "Ohccigiehtagirji 2003" addá dárkilis dieđuid sisaváldima, ohcanmearrádusaid ja sisaváldinčuoggáid rehkenastima birra. Buohkat geat jurddašit ohcat alit ohppui, fertejit háhkat alcceseaset dán gihppaga. Medisiinnas lea sierra diehtogihpa sisaváldima birra (dárkilet čilgehus lea 40. siiddus).

Oppalaš lohkangelbbolašvuohta

Oppalaš lohkangelbbolašvuođas leat guokte gáibádusa maid ferte deavdit:

1. Čađahan ja ceavzán 3 jagi joatkkaskuvlaoahpu (vuođđokurssa, JK1 ja JK2 dahje sullasačča)

dahje fágareive/svennereive

dahje deavdán 23 jagi sisaváldinjagis ja 5 jagi bargohárjehallan ja oahppu kombinašuvnnas, nu gohčoduvvon 23/5-njuolggadus.

2. Čuovvovaš dábálašfágat fertejit leat joatkkaskuvlaoahpus dahje váldot lassin dása:

dárogiella: váldogiella, liigegiella ja njálmmálaš (14 vahkkodiimmu)

eŋgelasgiella (5 vahkkodiimmu)

matematihkka (5 vahkkodiimmu)

luonddufága (5 vahkkodiimmu)

servodatfága: ođđaset historjá (4 vahkkodiimmu) ja servodatoahppa (2 vahkkodiimmu)

Gávdnojit maiddái eará vuogit movt joksat oppalaš lohkangelbbolašvuođa. Váldde oktavuođa Oahppoossodagain jus hálidat dárkilet dieđuid.