Bachelorgráda, oanehaččat

Bachelorprográmmain ádjána 3 jagi ja addá 180 oahppočuoggá. Eanaš bachelorprográmmain lea namma muhtun fága maŋis — basisfága — ovdamearkka dihte bachelor arkeologiijas dahje fysihkas, muhto don logat maiddái eará fágaid ja fáttáid mat dorjot basisfága. Muhtun oahppoprográmmat addet stuora válljenvejolašvuođaid, ja muhtun oahppoprográmmat fas leat ovdalgihtii mearriduvvon. Dát mearkkaša ahte prográmmas leat muhtun bákkolaš fáttát, muhtun fáttáid sáhtát válljet dihto fáttáid gaskkas, ja muhtun fáttáid lea fas áibbas du duohken válljet. Buot prográmmat addet vejolašvuođa lohkat muhtin áiggi olgoriikkas.

Muhtun oahppoprográmma siskkobealde sáhttet leat máŋga oahpposuorggi. Dát mearkkaša ahte mii leat ráhkadan gárvvisin máŋga variántta oahppoprográmmas mat dasto addet gelbbolašvuođa álgit iešguđetlágan mastergrádaide.

Oahppoprográmma rámmaid siskkobealde válljet dan mii du mielas addá dutnje buori vuođu bargguid dahje viidáset oahpu ektui. Jus dárbbašat veahki, de leat mis čeahpes bagadallit geat sáhttet veahkehit du gávdnat daid čovdosiid mat buoremusat heivejit dutnje. Buot bachelorprográmmaid sáhtát hukset viidáseappot mastergrádain (2 jagi — 120 oahppočuoggá). Jus válddát mastergráda, de lassánit maiddái du bargovejolašvuođat oahpu maŋŋel.

Mii leat sirren oahppoprográmmaid njealji váldojovkui — realfágat, servodatfágat, giella- ja kulturfágat ja fágaseagus. Juohke joavkkus gávnnat ovtta ovdamearkka dasa movt oahppoprográmma sáhttá bidjat oktii. Jus hálidat oaidnit eará oahppoprográmmaid ráhkadusa, de sáhtát ohcat min neahttasiidduin www.uit.no ja válljet "For studenter". Fágasehkosa vuolde leat prográmmat mat leat biddjon oktii fágaiguin mat dávjá leat hui iešguđetláganat. Dát addet ođđa, gelddolaš ja áigeguovdilis fágakombinašuvnnaid.