SV-fak. - Doktorgrad

Vedtatt 22.03.2004 (DL: 200300732-43) av styret ved Det samfunnsvitskaplege fakultet med heimel i forskrift for graden philosophiae doctor (PhD) ved Universitetet i Tromsø. Endra 23.04.2007 (Doculive: 200600493-21).

Studieplanen er utarbeidd med grunnlag i PhD-program i kultur- og samfunnsfag ved Det samfunnsvitskaplege fakultet, Universitetet i Tromsø.

Studieplan i samfunnsplanlegging og kulturforståing utdjupar faglege mål og krav for studentar ved PhD-program i kultur- og samfunnsfag med studieretning i samfunnsplanlegging og kulturforståing. Reglement og rettleiing av PhD-programmet, med utfyllende retningsliner om søknad, opptak og avtale, er skissert i PhD-program i kultur- og samfunnsfag.

Målet med studiet
Doktorgradsutdanninga i samfunnsplanlegging og kulturforståing skal kvalifisere for forskingsverksemd på eit høgt fagleg nivå, og for anna arbeid i samfunnet der det vert stilt store krav til vitskapleg innsikt. Studiet har eit sjølvstendig forskingsarbeid på eit spesialfelt med ei vitskapleg avhandling på høgt fagleg nivå som mål. I tillegg skal doktorgradsstudenten få ei vidaregåande opplæring i teori og metode som gjev fagleg fordjuping og breiddekunnskap i samfunnsplanlegging og kulturforståing, samstundes som faget vert sett inn i ei større ramme. Gjennom studiet skal studenten også få trening i formidling av vitskapleg arbeid.

Opplæringsdelen
Opplæringsdelen har følgjande obligatoriske komponentar:

Vitskapsteori med etikk, 10 studiepoeng
Fagleg teori, metode, design og prosjektutforming, 20 studiepoeng
Deltaking på internasjonal fagkonferanse
Deltaking på forskingsseminaret ved instituttet
Dessutan vert det stilt krav om fagleg formidling.

Doktorgradsstudentar kan ta kurs ved Universitetet i Tromsø. Kurs ved andre institusjonar, samt nasjonale og internasjonale fagkonferansar med relevant tematikk og tilstrekkeleg omfang kan også godkjennast som del av opplæringa. Vi rår til at opplæringsdelen vert gjennomført tidleg i doktorgradsstudiet.

Doktorgradsstudenten kan fritt velje dei kurs han/ho vil følgje innanfor opplæringsdelen, men det vert tilrådd å diskutere dette med rettleiaren først. Studenten vert oppmoda om å delta på så vel nasjonale som internasjonale konferansar.

Vitskapsteori med etikk:
SV-fakultetet skipar til faste årlege kurs i vitskapsteori med etikk (10 studiepoeng), med to samlingar á 3 dagar.

Fagleg teori:
Kurs i fagleg teori bør vere knytt opp mot sentrale faglege diskursar i faget.

Metode:
Kurs i metode skal vere relatert til fordjuping innanfor kvalitative og/eller kvantitative teknikkar.

Design/ prosjektutforming:
Studenten skal i løpet av første semester leggje fram og få tilbakemelding på sitt prosjektdesign som ein del av oppfølgingsprogram ved instituttet, normalt på forskingsseminaret ved instituttet. Formålet er å arbeide med å vidareutvikle doktorgradsprosjektet til studenten. Dette omfattar blant anna arbeid med utvikling og grunngjeving av problemstillingar, forklaringsmåtar, krav til dokumentasjon, argumentasjonsmåtar og krav til resultat i eige prosjekt. Prosjektet skal kommenterast av minst ein senior ved instituttet som ikkje er rettleiaren til studenten. Studenten skal levere eit revidert utkast til prosjektdesign som skal godkjennast av rettleiar i slutten av 1. semester. Dette, saman med deltaking på forskingsseminaret ved instituttet, kan gi inntil 5 studiepoeng.

Deltaking på internasjonal konferanse:
Deltaking på internasjonal fagkonferanse eller internasjonalt forskarkurs med presentasjon av paper. Kvar kandidat må gjennomføre eit slikt kurs eller delta på ein slik konferanse i løpet av studietida. Deltaking må dokumenterast ved godkjent paper eller skriftleg rapport. Deltaking med paper kan godskrivast med inntil 5 studiepoeng.

Forskingsseminar:
Doktorgradsstudentar skal normalt følgje forskingsseminaret ved Institutt for samfunnsplanlegging og kulturforståing. Det er eit krav med minst ein presentasjon av eige arbeid, og oppmøte på om lag 2/3 av seminara per semester. Det kan gjevast unntak for dette kravet for doktorgradsstudentar som ikkje held til på Universitetet i Tromsø.

Formidling:
Formidling kan dokumenterast gjennom undervisning, presentasjonar, populærvitskaplege publikasjonar, aktiv deltaking i forskingsseminar etc. Planar/idear om formidling kan diskuterast med rettleiar, institutt eller forskingseininga ved fakultetet.

Godkjenning av opplæringsdelen:

Studenten sender søknad om godkjenning av studiepoeng til fakultetet.
Ein søknad må minimum innehalde godkjenning av ein bolk i opplæringsdelen. Helst heile opplæringsdelen.
I tilfeller der det er tvil om kurs/konferanse kan godkjennast bør det sendast enkeltvis søknad om godkjenning av kurset/konferansen.
Studenten må opplyse om kva for kurs/konferansar han/ho ønskjer innpassa i dei ulike bolkane.
Ved tidlegare godkjenningar skal svarbrevet følgje den nye søknaden.
Fordelinga skal normalt vere 25 studiepoeng frå kurs og 5 studiepoeng frå fagkonferanse. Avvik frå denne norma krev spesielle grunnar.
Det skal ikkje vere direkte innhaldsmessig overlapp mellom kurs og/eller konferansedeltaking.

Krav til dokumentasjon for å få forskarkurs (som er fastsett med studiepoeng) godkjent inn i opplæringsdelen:

Lokale, nasjonale eller internasjonale forskar-/doktorgradskurs som er opplyst med studiepoeng vert vanlegvis godkjent med opplyste studiepoengomfang.
Godkjent deltaking/paper/eksamen skal dokumenterast med karakterutskrift, kursbevis eller liknande.

Krav til dokumentasjon for å få konferansedeltaking vurdert som studiepoeng:

Det skal vere ein vitskapleg eller fagleg konferanse, det vil seie at tema på konferansen er vitskapeleg og at føredragshaldarar er vitskapsmenn og kvinner. Innhaldet i konferansen må vere relevant for bolken studiepoenga skal innpassast i.
For å få 5 studiepoeng må konferansen minimum strekke seg over 3 dagar. Studenten må ha presentert paper på konferansen og lengda på paperet må minimum vere 10 sider.
Deltaking på konferansar med kortare tidslengd, eller deltaking utan å presentere paper vert ikkje godkjent.
Dokumentasjon på deltaking. For eksempel ved deltakarliste.
Dokumentasjon på presentasjon(ar). For eksempel med konferanseprogram.
Presenterte paper skal leggjast ved.

Slik skjer godkjenninga i praksis:

Forskingseininga sakshandsamar søknaden.
Leiar av utvalet handsamar søknader knytt til studiepoeng frå kurs.
Søknader om studiepoeng for deltaking på fagkonferanse vert sendt over til studenten sitt institutt. Instituttet vurderer og handsamar søknaden.
Dersom ein student har fått godkjent rett til å ta meir enn fem studiepoeng for deltaking på konferansar, vert desse godkjent av instituttet i samråd med leiar av Doktorgradsutvalet.
Ved tildeling av studiepoeng er rettleiar og birettleiar inhabile, men det er forventa at dei bidrar med nødvendig informasjon, følgjebrev og liknande.
Forskingseininga utformar svarbrev til studenten.
Leiar av Doktorgradsutvalet godkjenner heile opplæringsdelen. Utvalet vert orientert gjennom tilsendte kopier.
Vanskelege søknader vert lagt fram for Doktorgradsutvalet til handtering.
Klage vert handsama i Doktorgradsutvalet.