|
Studieplan for PhD-program i kultur- og samfunnsfag, studieretning i historie
Vedtatt 22.03.2004 (DL: 200300732-43) av styret ved Det samfunnsvitskaplege fakultet med heimel i forskrift for graden philosophiae doctor (PhD) ved Universitetet i Tromsø. Endra 23.04.2007 (Doculive: 200600493-21).
Studieplanen er utarbeidd med grunnlag i PhD-programmet i kultur- og samfunnsfag ved Det samfunnsvitskaplege fakultet, Universitetet i Tromsø.
Studieplan i historie utdjupar faglege mål og krav knytt til PhD-program i kultur- og samfunnsfag med studieretning i historie. Reglement og rettleiing for PhD-programmet, med utfyllande retningsliner om søknad, opptak og avtale, er skissert i PhD-program i kultur- og samfunnsfag.
Målet med studiet
Doktorgradsutdanninga i historie skal kvalifisere for forskingsverksemd på eit høgt fagleg nivå, og for anna arbeid i samfunnet der det vert stilt store krav til historisk innsikt. Studiet har eit sjølvstendig forskingsarbeid på eit spesialfelt med ei vitskapleg avhandling på høgt fagleg nivå som mål. I tillegg skal doktorgradsstudenten få ei vidaregåande opplæring i teori og metode som gjev fagleg fordjuping og breiddekunnskap i historie, samstundes som faget vert sett inn i ei større ramme. Gjennom studiet skal studenten også få trening i formidling av vitskapleg arbeid.
Opplæringsdelen
Opplæringsdelen inneheld desse obligatoriske komponentane:
- Vitskapsteori med etikk, 10 studiepoeng
- Fagspesifikk teori/metode, 20 studiepoeng
- Fagleg formidling
- Forskarseminar
Doktorgradsstudentar kan ta kurs ved Universitetet i Tromsø. Kurs ved andre institusjonar, samt nasjonale og internasjonale fagkonferansar med relevant tematikk og tilstrekkeleg omfang kan òg godkjennast som del av opplæringa. Vi tilrår at opplæringsdelen vert gjennomført i starten av doktorgradsstudiet.
Doktorgradsstudenten kan fritt velje kva kurs han/ho vil følgje innafor opplæringsdelen, men vert tilrådd å diskutere dette med rettleiaren først. Studenten vert oppmoda om å delta på så vel nasjonale som internasjonale konferansar.
Vitskapsteori med etikk:
SV-fakultetet skipar til faste årlege kurs i vitskapsteori med etikk (10 studiepoeng), med to samlingar á 3 dagar.
Fagspesifikk teori/metode:
Minimum 15 studiepoeng skal vere fagspesifikk teori/metode, medan 5 studiepoeng kan vere kurs av varierande tema. Instituttet vil mellom anna skipe til lesegrupper for PhD-studentar. Det vert også forventa at PhD-studentar deltar aktivt på forskarseminar ved instituttet.
Fagleg formidling:
Formidling kan dokumenterast gjennom undervisning, foredrag, populærvitskaplege publikasjonar, aktiv deltaking i forskingsseminar etc. Planar/idear om formidling kan diskuterast med rettleiar, institutt eller forskingseininga ved fakultetet.
Forskarseminar:
Studenten skal følgje forskarseminaret ved Institutt for historie og minst to gonger leggje fram delar av avhandlinga her og elles vise aktivitet i samband med diskusjon og kommentarar når andre legg fram på seminaret.
Godkjenning av opplæringsdelen:
- Studenten sender søknad om godkjenning av studiepoeng til fakultetet.
- Ein søknad må minimum innehalde godkjenning av ein bolk i opplæringsdelen. Helst heile opplæringsdelen.
- I tilfeller der det er tvil om kurs/konferanse kan godkjennast bør det sendast enkeltvis søknad om godkjenning av kurset/konferansen.
- Studenten må opplyse om kva for kurs/konferansar han/ho ønskjer innpassa i dei ulike bolkane.
- Ved tidlegare godkjenningar skal svarbrevet følgje den nye søknaden.
- Fordelinga skal normalt vere 25 studiepoeng frå kurs og 5 studiepoeng frå fagkonferanse. Avvik frå denne norma krev spesielle grunnar.
- Det skal ikkje vere direkte innhaldsmessig overlapp mellom kurs og/eller konferansedeltaking.
Krav til dokumentasjon for å få forskarkurs (som er fastsett med studiepoeng) godkjent inn i opplæringsdelen:
- Lokale, nasjonale eller internasjonale forskar-/doktorgradskurs som er opplyst med studiepoeng vert vanlegvis godkjent med opplyste studiepoengomfang.
- Godkjent deltaking/paper/eksamen skal dokumenterast med karakterutskrift, kursbevis eller liknande.
Krav til dokumentasjon for å få konferansedeltaking vurdert som studiepoeng:
- Det skal vere ein vitskapleg eller fagleg konferanse, det vil seie at tema på konferansen er vitskapeleg og at føredragshaldarar er vitskapsmenn og kvinner. Innhaldet i konferansen må vere relevant for bolken studiepoenga skal innpassast i.
- For å få 5 studiepoeng må konferansen minimum strekke seg over 3 dagar. Studenten må ha presentert paper på konferansen og lengda på paperet må minimum vere 10 sider.
- Deltaking på konferansar med kortare tidslengd, eller deltaking utan å presentere paper vert ikkje godkjent.
- Dokumentasjon på deltaking. For eksempel ved deltakarliste.
- Dokumentasjon på presentasjon(ar). For eksempel med konferanseprogram.
- Presenterte paper skal leggjast ved.
Slik skjer godkjenninga i praksis:
- Forskingseininga sakshandsamar søknaden.
- Leiar av utvalet handsamar søknader knytt til studiepoeng frå kurs.
- Søknader om studiepoeng for deltaking på fagkonferanse vert sendt over til studenten sitt institutt. Instituttet vurderer og handsamar søknaden.
- Dersom ein student har fått godkjent rett til å ta meir enn fem studiepoeng for deltaking på konferansar, vert desse godkjent av instituttet i samråd med leiar av Doktorgradsutvalet.
- Ved tildeling av studiepoeng er rettleiar og birettleiar inhabile, men det er forventa at dei bidrar med nødvendig informasjon, følgjebrev og liknande.
- Forskingseininga utformar svarbrev til studenten.
- Leiar av Doktorgradsutvalet godkjenner heile opplæringsdelen. Utvalet vert orientert gjennom tilsendte kopier.
- Vanskelege søknader vert lagt fram for Doktorgradsutvalet til handtering.
- Klage vert handsama i Doktorgradsutvalet.
|
