Alimusrievtti viessu

Alimusrievtti viessu

1895:s juolludii Stuorradiggi ruđa ráhkkanišgoahtit hukset Justisviesu, masa galge čáhkat buot golbma riekteásahusa: gávpotriekti, lágamánneriekti ja Alimusriekti.  Arkiteaktagilvu almmuhuvvui ja 1898 njukčamánus ledje 23 evttohusa boahtán, ja golbma vuoittu addojuvvojedje.  Muhto, okta evttohus bođii maŋŋá áigemeari go dat lei sáddejuvvon fatnasa mielde Bergenis.  Arkiteavtta Hans Jakob Sparre evttohus dat lei ja dan atne nu buorren ahte dat válljejuvvui ovdalat dán golbma vuoiti. Nu leage arkiteavtta Sparre Justisviesu evttohus mii ceggejuvvui. 

Su váldojurdda lei juohkit viesu horisontalaččat nu ahte doaimmat sirrejuvvojedje dásiid mielde ja dakkár juohkin vástidiige dán golmma riekteásahussii.

Riektelanjat ledje iešguđet gearddis, ja hápmi lei árvvolaš ja monumenttalaš.

Guhkes ja gáržžes viessosadji lei stuorra hástalus arkitehktonalaččat, juoga maid Sparre viehka vuohkkasit čovddii.  Son bijai vuosttasinstánssa, gávpotrievtti vuosttas geardái ja dan olgguldas čábbodat ja olgouksa šattai Grubbegatena beallái.  Stuorámus diggelanja bijai nuppi geardái gosa beasai hirbmat stuorra vuostáiváldinlanja čađa ja stuorra tráhppáfeaskkir doalvvui njuolga stuorámus diggelatnjii.  Lágamánneriekti oaččui dán diggelanja.  Alimusrievtti diggelatnja lei goalmmát gearddis ja doppe lei čáppa rohpečuovga ja glásat ledje Akersgatena guvlui, ja sierra olgouksa lei siidouvssa bokte.