Dearvvašvuođabargiid ja/dahje doaimmaid váidin
Jus oaivvildat iežat leat boastut dikšojuvvon dahje ahte dearvvašvuođabargit leat rihkkon geatnegasvuođaid du guovdu, ovdamearkka dihte dohkálaš divššu hárrái, de sáhtát dáhttut fylkka Dearvvašvuođageahču árvvoštallat dili. Muhtun oktavuođain sáhttá fylkka Dearvvašvuođageahčču sáddet ášši Stáhta dearvvašvuođagehččui, vai dat árvvoštallá váikkuhusaid dearvvašvuođabargiid lága kap. 11 olis. Dearvvašvuođalága rihkkumiid ovddas sáhttá oažžut čálalaš várrehusa dahje massit autorisašuvnna/almmolaš dohkkeheami dearvvašvuođabargin.
Divššohasvuoigatvuođaid váilevaš ollašuhttima váidin
Jus oaivvildat divššohasvuoigatvuođaidat leat rihkkojuvvon, de sáhtát dáhttut das guhte dearvvašvuođaveahki galgá addit ahte vuoigatvuohta ollašuvvo divššohasvuoigatvuođalága § 7-1 olis. Easkka dalle go vuoigatvuohta ii ollašuhtto, vaikko leat dan dáhtton, sáhtát váidit fylkka Dearvvašvuođagehččui. Váidinvuoigatvuohta čilgejuvvo divššohasvuoigatvuođalágas § 7-2.
Psyhkalaš dearvvašvuođasuodjalusa mearrádusaid váidin
Psyhkalaš dearvvašvuođasuodjalusas leat ásahuvvon sierra dárkkistankommišuvnnat main lea váldoovddasvástádus dárkkistit ja bearráigeahččat mearrádusaid mat dahkkojit bákkolaš psyhkalaš dearvvašvuođasuodjalusa hárrái. Dárkkistankommišuvnna váldodoaibman lea áimmahuššat divššohasaid riektesihkarvuođa, ja bearráigeahččat ahte láhkaaddon vuoigatvuođat doahttaluvvojit. Dárkkistankommišuvnnat leat iešheanalis hálddašanorgánat ja guovddáš váidinásahussan psyhkalaš dearvvašvuođasuodjalusa áššiid dáfus.
Buot divššohasain mat gullet psyhkalaš dearvvašvuođasuodjalussii, lea vuoigatvuohta váldit oktavuođa dahje váidit dárkkistankommišuvdnii. Dárkkistankommišuvdna meannuda váidagiid viidát iskkadeami (observašuvnna), ásaheami, bisuheami dahje bákkolaš psyhkalaš dearvvašvuođasuodjalusa loahpaheami hárrái, ja maiddái sirdináššiid hárrái. Jus dárkkistankommišuvdna ii vuhtii váldde bákkolaš psyhkalaš dearvvašvuođasuodjalusa áššiid váidaga, de lea divššohasas vuoigatvuohta ovddidit ášši duopmostuoluide. Bággodikšunmearrádusaid sáhttá divššohas váidit dan fylkka Fylkkamánnái gos dearvvašvuođaveahkki addo. Dát gusto maiddái váidagiidda sisačáliheami, dikšuma ja orruma hárrái.
Váidinortnegiid mearrádusat leat čilgejuvvon psyhkalaš dearvvašvuođasuodjalusa lágas.
Divššohasain geat gullet bákkolaš psyhkalaš dearvvašvuođasuodjalussii, leat maiddái vuoigatvuođat divššohasvuoigatvuođalága olis, jus fal eará ii leat mearriduvvon.
Divššohasáittardeaddjit
Don sáhtát váldit divššohasáittardeddjiin oktavuođa go:
Leat vásihan dakkár dáhpáhusaid maid oaivvildat leat dohkketmeahttumis dearvvašvuođaveahkkin. Dahje go dárbbašat rávvagiid dasa movt ain joatkit áššiin. Dahje go váillahat dieđuid vuoigatvuođaidat ja ortnegiid birra. Muhtumat váldet oktavuođa go eai ieža sáhte áimmahuššat vuoigatvuođaideaset. Muhtumat fas váldet oktavuođa vai besset áittardeaddjái addit dieđuid ja muitalit vásáhusaideaset birra, sihke buriid ja heajos vásáhusaid birra. Divššohasáittardeaddjit leat juohke fylkkas.
Liŋkkat
|