Lagas olbmuid vuoigatvuohta gáibidit bággodiššu árvvoštallojuvvot
Go lagas olmmoš dieđiha gárrenmirkogeavaheami sosiálabálvalussii, de galgá bálvalus čađahit dárbbašlaš iskkademiid áššis, ja dasto árvvoštallat galgá go bággoášši ovddiduvvot sosiála áššiid fylkkalávdegoddái.


Gii lea lagas olmmoš?
Lagas olmmoš sáhttá leat beallelaš, registrerejuvvon guoibmi, olmmoš guhte eallá áššebeliin náittussullasaš dahje guoibmesullasaš oktavuođas, váhnen, válddálaš mánná dahje válddálaš oappát ja vieljat. Lagas olbmos galgá leat bistevaš ja geažos áiggi oktavuohta gárrenmirkogeavaheddjiin.

Registrerejeuvvon guoibmi lea rievttálaččat seammaárvosaš go náittusbeallelaš. Earet dan árvvoštallama mii lea dárbbašlaš mearridettiin eallá go olmmoš náittussullasaš dahje guoibmesullasaš oktavuođas, de ii raba mearrádus aŋkke vejolašvuođa árvvoštallat gii lea lagas olmmoš. Gárrenmirkogeavaheaddji ja lagas olbmo oktavuohta lea baicca deaŧalaš eaktun. Oktavuođaeaktu sáhttá árvvoštallojuvvot, ii ge galgga dulkojuvvot gáržžet.

Maid galgá suohkan bargat?
Suohkan galgá, maŋŋel go lagas olmmoš lea dieđihan, guorahallat ášši ja árvvoštallat leat go sosiálabálvaluslága §§ 6-2 ja 6-2a eavttut ollašuvvan, ja berre go bággoášši ovddidit. Konkrehta dilálašvuohta mearrida man viidát ášši árvvoštallojuvvo. Dás ferte sosiálabálvalus árvvoštallat dili. Go sosiálabálvalus lea guorahallan dieđiheami, de galgá lagas olbmui dieđihit ahte árvvoštallan lea čađahuvvon. Jávohisvuođageasku eastada lagas olbmuid beassamis diehtit árvvoštallama bohtosa.

Liŋkkat