Go suohkan gieđahallá sosiálabálvalusaid dahje ekonomalaš sosiálaveahki ohcamušaid, de galgá ohcci veahkkedárbu álggos sierra árvvoštallojuvvot. Ovdalgo mearrádus dahkko, de galgá danne ohcci dilálašvuohta guorahallojuvvot. Suohkan galgá erenoamážit vuhtiiváldit ohcci oaivila, ja nu bures go vejolaš geahččalit guoskevaš olbmui heivehit čovdosiid.

Mađi mávssolaččat bálvalus lea ohcci buresbirgejupmái ja eallindilálašvuhtii, dađi deaŧalet lea ráđđádallat ohcciin. Lea deaŧalaš ahte bálvalusbargit maiddái ráđđádallet geavaheddjiin dalle go bálvalus addo.

Vai suohkan sáhttá buoridit iežas bálvalusaid, de lea mávssolaš ahte geavaheaddjit ovddidit oaiviliiddeset bálvalusaid birra.

Diktit earáid ovddastit du

Ohccis lea vuoigatvuohta diktit earáid ovddastit iežas. Jus lea doaimmashehttejuvvon, dahje jus sutnje lea váttis dovddáhit iežas sávaldagaid, de addá láhka váldeguoddái (dárogillii verge, jorgaluvvon lágas gohčoduvvon oapmahaš), veahkkeváldeguoddái (lágas veahkkeoapmahaš) dahje lagamus olbmuide (oapmahaččaide)  lobi ovddastit ohcci bálvalusa dáfus.

Juohkehaš sáhttá diktit advokáhta dahje eará doaimmaheaddji ovddastit iežas (hálddašanlága § 12). Doaimmaheaddji guhte ovddasta earáid ja ii leat advokáhtta, galgá ovddidit čálalaš fápmudusa. Sosiálabálvalusa ámmátolbmot eai sáhte leat doaimmaheaddjin dakkár áššiin maid sin ásahus meannuda (hálddašanlága § 6).

Liŋkkat