|
Vuoigatvuohta oažžut geavatlaš veahki ja oahpaheami (ruovttuveahki)
Go olmmoš ohcá bálvalusaid sosiálabálvaluslága § 4-2 olis, de galgá sosiálabálvalus kártet lea go ohcci dan dilis mii lea čilgejuvvon lága §:s 4-3. Dán paragráfa mielde galgá juohkehaš guhte ii nákce iežas fuolahit, dahje guhte oalát dárbbaša geavatlaš dahje peršovnnalaš veahki doaimmahit gieđabirasbargguid, oažžut sosiála bálvalusaid ja doaibmabijuid. Dát leat lagabui čilgejuvvon sosiálabálvaluslága §:s 4-2 bustávain a-d.
Dakkár bálvalus lea geavatlaš veahkki ja oahpaheapmi. Ulbmilin lea veahkehit bálvalusvuostáiváldi nu ahte ieš birge ásodagastis vaikko doaibmannávccat leat ge heajut.
Olbmos sáhttá maiddái leat vuoigatvuohta bálvalusaide jus dat lea eaktun su iešbirgemii ruovttus dahje bargoeallimis. Njuolggadusa mielde gusto dát dattege dušše daidda bálvalusaide mat leat sosiálabálvalusa ovddasvástádussan.
Makkár veahkki?
Bálvalus sáhttá leat omd. ruovttuveahkki, sadjásaš dálueamit, ruovttukonsuleanta, ássanbagadeapmi, viessohoaiddárbálvalus ja beaivválaš doaimmaid oahpaheapmi. Bálvalus sáhttá leat sihke geavatlaš veahkki, veahkki iežas fuolahit, iežas dikšut, ja beaivválaš bargguid oahpaheapmi. Dikšun- ja fuolahusbálvalusa kvalitehta hárrái lea mearriduvvon sierra láhkaásahus.
Máksu
Suohkan sáhttá gáibidit mávssu dihto sosiála bálvalusaid ovddas, muhto ii iežasfuolaheami ja iežasdikšuma veahki ovddas. Sosiálabálvalusaide mat addojit ásahusa olggobealde, lea mearriduvvon sierra láhkaásahus.
.
Ohcan ja váidin
Sosiála bálvalusaid ohcama galgá suohkan meannudit. Dábálaččat galleda suohkan ruovttu gávnnahan dihte makkár veahki ohcci dárbbaša. Geavatlaš veahkki ja oahpaheapmi sáhttá leat áigeguovdil. Suohkan galgá dahkat mearrádusa ohcamuša hárrái, ja čilget makkár ja man olu veahkki fállojuvvo. Jus ohcci oaivvilda ahte suohkana fálaldat ii govčča su sosiála bálvalusa dárbbu, de sáhttá son váidit suohkana mearrádusa. Fylkkamánni lea váidinásahus. Váidda sáddejuvvo suohkanii.
Liŋkkat
Maŋemus rievdaduvvon 8.11.2004
|