Vuoigatvuohta oažžut saji ásahussii dahje ásodahkii gos lea birrajándora fuolahusbálvalus
Fuolahusdárbu sáhttá leat nu stuoris ahte ii birge iežas ruovttus. Suohkanis lea danne ovddasvástádus hálddašit sajiid ásahusain ja ásodagain gos lea birrajándora fuolahusbálvalus, omd. suohkana boarrásiidsiiddas, priváhta divššus, ja ásodagain gos sáhttet orrut mánát ja nuorat vuollel 18 jagi geat eai oro váhnenruovttus. Dát sajit várrejuvvojit sihke gaskaboddosaš ja bistevaš orrumii.

Jus suohkan gávnnaha dohkálažžan addit bálvalusaid ohcci iežas ruovttus, de sáhttá dát čađahuvvot molssaeaktun dahje oktanaga guhkilmas dahje oanehet áiggi orrumiin ásahusas.

Gárrenmirkoásahusat
Gárrenmirkogeavaheddjiid dikšunplánas galget vuosttažettiin leat doaimmat ja bálvalusat ásahusaid olggobealde. Jus dát veahkki ii leat doarvái, de galgá sosiálabálvalus veahkkin ásahit dikšunplána omd. spesiálaásahussaji bokte. Jus dakkár ásahussaji ii sáhte fállat, de galgá sosiálabálvalus čađahit dárbbašlaš gaskaboddosaš doaibmabijuid. Dat mearkkaša ahte suohkan ferte sihkkarastit gárrenmirkogeavaheaddjái dárbbašlaš veahki, vaikkoba birrajándora fálaldaga dan áiggis go gárrenmirkogeavaheaddji vuordá beassat heivvolaš ásahussii.

Ohcan ja váidda
Ohcan ovddiduvvo suohkanii. Suohkan galgá dahkat mearrádusa ohcamuša hárrái, ja čilget makkár ja man olu veahkki fállojuvvo. Jus ohcci oaivvilda ahte suohkana fálaldat ii govčča su sosiála bálvalusa dárbbu, de sáhttá son váidit suohkana mearrádusa. Fylkkamánni lea váidinásahus. Váidda sáddejuvvo suohkanii.

Liŋkkat