Fuolahusbálká lea suohkanlaš máksu oapmahaččaide/lagamuččaide dahje eaktudáhtolaš fuolaheddjiide geat fuolahit olbmuid mat dárbbašit eatnat fuolahusa agi, doaimmashehttejumi dahje buozanvuođa geažil.
Ii leat bajimus ahkemearri fuolahusbálkká oažžumii.

Eaktun oažžut fuolahusbálkká lea ahte fuolahusbargu doaimmahuvvo iežas ruovttus. Fuolahusbarggu noađđi ja suohkana ruhtadilli leat guovddáš bealit das go fuolahusbálkká ohcan gieđahallo. Johtočállosis fuolahusbálkká birra, gosa lea liŋka dás vuollelis, leat dat eavttut čujuhuvvon maid suohkan galgá vuhtii váldit iežas árvvoštallamis.

Ii ovttasge leat eavttuhis vuoigatvuohta oažžut fuolahusbálkká, muhto suohkanis lea geatnegasvuohta fállat dakkár ortnega. Suohkan ii sáhte biehttalit bálkká dainna ákkain ahte sis ii leat dat ortnet dahje eai leat doarvái ruđa várren bušeahtas, muhto suohkan sáhttá fállat eará bálvalusaid mat gokčet fuolahusdárbbu.

Fuolahusbálká veahkkedoarjaga ektui
Go suohkan mearrida diibmologu bearraša fuolahusnoađi ektui, de rehkenastojuvvojit mielde maiddái eará bálvalusat maid bearaš oažžu. Fuolahusbálká juolluduvvo beroškeahttá bearraša ruhtadilis, muhto suohkan sáhttá oktiiheivehit fuolahusbálkká álbmotoaju veahkkedoarjagiin. Suohkan sáhttá gáibidit ahte vuos ohccojuvvo veahkkedoarjja ovdal go fuolahusbálká juolluduvvo dahje suohkan sáhttá unnidit fuolahusbálkká seamma summain go veahkkedoarjja lea. Dákko lea iešguđet suohkaniin iešguđet vierru. Veahkkedoarjja juolluduvvo sutnje gii dárbbaša veahki, ja fuolahusbálká máksojuvvo sutnje gii veahkeha. Johtočállosis fuolahusbálkká njuolggadusaid birra čállá Sosiáladepartemeanta: ”Suohkan ii berre unnidit fuolahusbálkká, jus fal fuolahusbálká ja veahkkedoarjja oktiibuot ii daga eanet go dan maid lea govttolaš máksit fuolahusbarggu ovddas.”

Ohcan ja váidin
Fuolahusbálkká ohcan sáddejuvvo suohkanii. Suohkan galgá dahkat mearrádusa mas ohcan árvvoštallojuvvo, ja mas dieđihuvvo makkár veahki suohkan fállá ja man viiddis veahkki lea. Sihke sus gii dárbbaha veahki ja sus gii veahkeha, lea vuoigatvuohta ohcat fuolahusbálkká ja vuoigatvuohta váidit suohkana mearrádusa áššis. Fylkkamánni lea váidinásahus, muhto váidda sáddejuvvo suohkanii.

Liŋkkat