Norggas lea juohkehaččas vuoigatvuohta oažžut dárbbašlaš dearvvašvuođaveahki doppe gos orru, dahje doppe gos orostallá.
Dárbbašlaš dearvvašvuođaveahkki lea dearvvašvuođabálvalus mii lea suohkana dahje stáhta ovddasvástádussan doaimmahit. Suohkanis leat dat doaimmat ovdamearkka dihte dikšun- ja fuolahusbálvalusat, dábálaš doaktáriid lusa beassan, fysioterapiija, dearvvašvuođaguovddášdoaimmat, skuvla- ja fylkkasuohkana bátnedikšunbálvalus ja sihke medisiinnalaš ja eará veajuiduhttin. Stáhtas gusto dát spesialistadearvvašvuođabálvalussii. Spesialistadearvvašvuođabálvalusain oaivvilduvvo vuosttažettiin buohcciviesuid, poliklinihkaid ja guovllupsykiáhtralaš guovddážiid dearvvašvuođabálvalus.
Du vuoigatvuođat fertejit medisiinnalaččat árvvoštallojuvvot. Dus lea álo riekti oažžut fáhkkaveahki. Vuoigatvuohta fáhkkaveahki oažžut, lea ovdamearkka dihte jus šaddá duođalaš vahága gillát dahje lea heakkavárra ja dearvvašvuođavárra jus dikšuma maŋida. Dearvvašvuođaveahki vuoigatvuohta ráddjejuvvo veahá go dikšun galgá duođaštuvvot leat ávkkálažžan. Dearvvašvuođadoaimma golut fertejit leat govttolaččat doaimma ávkki ektui. Danne it sáhte ovdamearkka dihte gáibidit iskkadandikšuma dahje eksperimentála dikšuma. Dohkálaš dearvvašvuođaveahki unnimus meari ii sáhte dattege garvit ekonomalaš ákkaid geažil.
Lágas divššohasvuoigatvuođaid birra § 2-1, čilgejuvvo vuoigatvuohta oažžut dárbbašlaš dearvvašvuođaveahki. Jus vuoigatvuohta ii ollašuva, de sáhtát váidit dan fylkka Dearvvašvuođagehččui gos dearvvašvuođabálvalus galgá addot. Divššohasvuoigatvuođalága §:s 7-2 čilgejuvvo váidinriekti.
Divššohasvuoigatvuođalága čakčamánu 1.b. rievdadusaid mielde, oažžu divššohas geas lea vuoigatvuohta oažžut dárbbašlaš dearvvašvuođaveahki, mearribeaivvi goas maŋemusat galgá oažžut dárbbašlaš dearvvašvuođaveahki.
Jus vuoigatvuođalaš divššohassii ii fállojuvvo dikšu ovdal dan áigemeari mii lea mearriduvvon, de lea divššohasas vuoigatvuohta dakkaviđe oažžut veahki Norgga eará buohcciviesus dahje olgoriikkas. Lea Riikkaoadjodoaimmahaga ovddasvástádus ohcat dikšunsaji jus áigemearri ii dollojuvvo. Riikaoadjodoaimmahagain sáhttá váldit oktavuohta telefovnna bokte nr. 815 335 33.
Buot divššohasat geain lea oktavuohta spesialistadearvvašvuođabálvalusain, galget beassat diehtit árvvoštallama bohtosiid, lea go vuoigatvuohta dárbbašlaš dearvvašvuođaveahkkái ja lea go biddjon áigemearri dearvvašvuođaveahki addimii. Galget maiddái addot dieđut váidinlobi, váidináigemeari ja vejolaš váidinvuogi birra.
Liŋkkat
Maŋemus rievdaduvvon 3.9.2004
|