Buot dearvvašvuođabálvalusa dikšundoaimmat leat eanas muddui eaktodáhtolaččat. Ovdal go dikšun sáhttá álggahuvvot, de fertet don dasa mieđihit. Sihke njálmmálaš ja jávohis miehtan dohkkehuvvo. Dattege galggat leat ožžon doarvái dieđuid buozanvuođa, diagnosa, divššu ja váraid birra vai sáhtát vuđolaččat árvvoštallat ovdal go mieđihat. Miehtama sáhtát geassit ruovttoluotta. Dalle lea dus vuoigatvuohta oažžut dieđu das movt váikkuha dutnje jus divššu biehttalat.
Dus lea dábálaččat vuoigatvuohta miehtat dikšumii go leat válddálaš dahje go leat vuolleahkásaš badjel 16 jagi. Mánát gaskal 12 ja 16 jagi galget leat mielde mearrideamis gažaldagain mat gusket sin iežaset dearvvašvuhtii ja dikšumii, muhto loahpalaččat galget váhnemat miehtat dearvvašvuođaveahkkái. Divššohasvuoigatvuođaláhka rahpá vejolašvuođa muhtun oktavuođain dohkkehit ahte mánát gaskal 12 ja 16 jagi eai dáhto váhnemiiddaset diehtit sin oktavuođa birra dearvvašvuođabálvalusain. Danne sáhttet dearvvašvuođabargit konkrehta árvvoštallama vuođul spiehkastit váldonjuolggadusas, mas daddjo ahte váhnemiin lea dievaslaš miehtangealbu mánáid ovddas geat leat vuollel 16 jagi.
Heahtedilálašvuođain galget dearvvašvuođabargit dikšut almmá ovdalis namuhuvvon miehtama haga, muhto dihto dilálašvuođain sáhttá dás spiehkastit.
Divššohasvuoigatvuođalága § 4-1 ja viidáset paragráfat nannejit vuoigatvuođa miehtat dikšumii, ja don sáhtát dáhttut das gii dearvvašvuođaveahki addá, ahte vuoigatvuohta ollašuhttojuvvo divššohasvuoigatvuođalága § 7-1 olis. Jus vuoigatvuohta ii ollašuva, de sáhtát váidit dan fylkka Dearvvašvuođagehččui gos veahkki addo. Váidinvuoigatvuohta lea čilgejuvvon divššohasvuoigatvuođalágas § 7-2.
Liŋkkat
Maŋemus rievdaduvvon 29.3.2004
|