Dearvvašvuođabargiin lea geatnegasvuohta čiegusin doallat dieđuid du dearvvašvuođa, buozanvuođa, divššu ja eará persovnnalaš áššiid birra. Ii leat dábálaččat lohpi addit dieđuid dan ge birra ahte leat divššohassan/pasieantan. Dieđut sáhttet datte addot eará dearvvašvuođabargiide geat leat mielde du divššu lágideame. Dát guoská liikká dušše dieđuide mat leat dárbbašlaččat du divššu ja čuovvoleami dáfus.
Dearvvašvuođabarggiin lea dábálaččat maiddái jávohisvuođageatnegasvuohta badjel 16 jagi mánáid dáfus váhnemiid/fuolaheddjiid guovdu, jus mánná ieš ii leat mieđihan dieđuid addimii. Muhtun oktavuođain lea jávohisvuođageatnegasvuohta váhnemiid/fuolaheddjiid ektui maiddái 12 - 16 jagi ahkásaš mánáid dáfus. Dát gusto dalle go pasieanta ieš ii hálit dieđuid addojuvvot ja go sus leat ákkat maid ferte doahttalit.
Don sáhtát ieš mearridit ahte jávohisvuođageatnegasvuohta ložžejuvvo ovdamearkka dihte du lagamuččaid ektui.
Muhtun erenoamáš dilálašvuođain eai leat dearvvašvuođabargit geatnegasat orrut jávohaga. Ovdamearkka dihte lea dearvvašvuođabargiin geatnegasvuohta dieđihit mánáidsuodjalussii jus lea ágga navdit ahte mánná illástuvvo ruovttus, dahje jus navdet eará duođalaš fuollameahttunvuođaid dáhpáhuvvat.
Jus jávohisvuođageasku lea ložžejuvvon, de lea dus dábálaččat vuoigatvuohta diehtit geasa dieđut leat addojuvvon, ja guđet dieđut leat addon.
Vuoigatvuohta oažžut dieđuid dollojuvvot čiegusin lea nannejuvvon divššohasvuoigatvuođalágas § 3-6 ja dearvvašvuođabargiid jávohisvuođageatnegasvuohta lea nannejuvvon dearvvašvuođabargiidlágas §§:in 21 – 29.
Jus jávohisvuođageasku lea rihkkojuvvon, de sáhtát ávžžuhit iežat fylkka Dearvvašvuođageahču árvvoštallat lea go dát geatnegasvuođa rihkkun dearvvašvuođabargiidlága § 55 mielde. Don sáhtát maid ávžžuhit dan gii addá dearvvašvuođaveahki deavdit du vuoigatvuođa oažžut dieđuid dollojuvvot čiegusin divššohasvuoigatvuođalága § 7-1 mielde. Jus vuoigatvuohta ii devdojuvvo, de sáhtát váidit dan fylkka Dearvvašvuođagehččui gos dikšu addojuvvo. Váidinvuoigatvuohta boahtá ovdan divššohasvuoigatvuođalágas § 7-2.
Liŋkkat
Maŋemus rievdaduvvon 29.3.2004
|