Mánáin leat dihto sierravuoigatvuođat dearvvašvuođasuorggis. Ovdamearkka dihte lea mánáin vuoigatvuohta oažžut dearvvašvuođadivššu dan suohkanis gos orrot.
Jus mánná biddjo dearvvašvuođaásahussii, de lea sus vuoigatvuohta ovttastallat váhnemiiguin dahje eará fuolaheddjiiguin. Lea dearvvašvuođaásahusa geatnegasvuohta lágidit dán ovttastallama. Ovdamearkka dihte galgá váhnemiidda fállot idjadit ja boradit mánáin fárrolaga. Mánáin lea maid vuoigatvuohta aktiviserejuvvot ja sis lea maiddái vuoigatvuohta oažžut oahpahusa man muđui massáše dan botta go leat dearvvašvuođaásahusas. Dearvvašvuođabargit sáhttet addit eanet dieđuid fálaldagaid birra, ja muitalit gii ain sáhttá eanet veahkehit dan oktavuođas. Mánáid vuoigatvuođat dearvvašvuođaásahusain leat dárkileappot čilgejuvvon guoskevaš láhkaásahusain.
Muhtumat mánáid vuoigatvuođain leat láhkanannejuvvon divššohasvuoigatvuođalága § 6-1 rájes § 6-4 rádjái ja don sáhtát čujuhit sutnje gii addá dearvvašvuođadivššu ahte vuoigatvuohta galgá devdojuvvot divššohasvuoigatvuođalága § 7-1 mielde. Jus vuoigatvuohta ii devdojuvvo, de sáhtát váidit dan fylkka Dearvvašvuođagehččui gos dikšu addojuvvo. Váidinvuoigatvuohta čilgejuvvo divššohasvuoigatvuođalágas § 7-2.
Liŋkkat
Maŋemus rievdaduvvon 8.11.2004
|