Buhtadus Norsk pasientskadeerstatning-ortnegis
(Norgga divššohasvahátbuhtadusa)
Dus sáhttá leat vuoigatvuohta oažžut buhtaduvvot vahága maid leat ožžon go leat divššohassan leamaš. Norsk pasientskadeerstatning (NPE) (Norgga divššohatvahátbuhtadus) http://www.npe.no/ lea sierra buhtadusortnet mii lea ásahuvvon rumašlaš divššohasvahágiid ovddas mat leat šaddan almmolaš dearvvašvuođadoaimmas. Dus lea vuoigatvuohta oažžut buhtadusa jus dihto eavttut devdojuvvojit. Divššohasáittardeaddji dahje NPE addá dárkilet dieđuid dáid birra. NPE` buhtadus gusto dál dušše almmolaš dearvvašvuođadoibmii.
Dábálaš vahátbuhtadus
Dus sáhttá leat vuoigatvuohta vahátbuhtaduslága olis oažžut buhtaduvvot vahága maid leat ožžon go leat divššohassan leamaš. Jus dábálaš buhtadusgáibádussii galgá mieđihuvvot, de eaktuduvvo ahte leat duođaštuvvon moaittehahtti dilálašvuođat (váruhisvuohta) dan orgána dahje olbmo bealis mas don gáibidat buhtadusa. Dán dilálašvuođa šaddá duođaštit son gii gáibida buhtadusa. Gáibiduvvo dábálaččat maid ahte vaháguvvon olmmoš galgá leat gillán ekonomalaš vahága. Ekonomalaš vahát ferte leat njuolga čuožžilan moitojuvvon dilálašvuođa geažil. Gáibádusa boarásnuvvanmearri lea dábálaččat golbma jagi dan rájes go vahát duođaštuvvui. Advokáhtat sáhttet addit dárkilet dieđuid dábálaš vahátbuhtadusa birra.
Šállobuhtadus
Áibbas erenoamáš oktavuođain sáhttá leat vuoigatvuohta oažžut šállobuhtadusa. Dát buhtadusortnet lea ásahuvvon gokčan dihte dáhpáhusaid mat eai gula dábálaš buhtadusortnegiidda, muhto go lea erenoamáš ágga addit vaháguvvomii buhtadusa. Ohccis ii gáibiduvvo ahte galgá duođaštit váruhisvuođa vai šállobuhtadusa oažžu. Šállobuhtadus sáhttá buhttet juohkelágán vahága, sihke ekonomalaš vahága ja vahága mii ii leat ekonomalaš. Son guhte lea erenoamážit vaháguvvon dihto dilálašvuođain lea dat gii vuosttažettiin galgá oažžut šállobuhtadusa. Šállobuhtadusa ohcan stáhtas sáddejuvvo Justiisadepartementii. Šállobuhtadusáššit eai boarásnuva goassege.
Dálkkasvaháguvvamat - sierra buhtadusortnet
Sidjiide geat vihkáduvvet dálkkasgeavaheami geažil, lea ásahuvvon sierra buhtadusortnet, Legemiddelforsikringspoolen (Dálkkasdáhkáduspoola), Skadeoppgjørskontoret (Vahátmáksokantuvra), Postboks 1733 Vika, 0121 Oslo
Maŋemus rievdaduvvon 30.3.2004
|