Vuoigatvuohta oažžut individuála plána
Son guhte dárbbaša veahkkeásahusaid guhkilmas ja oktiiheivehuvvon bálvalusaid, galgá maiddái oažžut ráhkaduvvot alcces plána. Plána galgá ráhkaduvvot ovttasráđiid geavaheddjiin, vrd. sosiálabálvaluslága § 8-4. Suohkana sosiálabálvalus galgá maiddái ovttasbargat geavaheddjiin ja eará bálvalusaddiiguin plána hárrái, vai bálvalusfálaldat vuhtii váldá guoskevaš olbmo dárbbuid ja vai šaddá ollislažžan.

Individuála plána ulbmil
Individuála plána ulbmil lea guhkilmasat ja ollislaččat guorahallat geavaheddjiid geat dárbbašit guhkilmas ja oktiiheivehuvvon bálvalusaid. Olu geavaheaddjit dárbbašit máŋgga iešguđet etáhtaid, ossodagaid ja hálddašandásiid bálvalusaid. Sii leat omd. fysalaš doaimmashehttejuvvon olbmot, psyhkalaš doaimmashehttejuvvon olbmot, olbmot geat gillájit psyhkalaččat ja gárrenmirkogeavaheaddjit. Individuála plána bokte šaddet bálvalusat vuorddehahttit ja buorebut oktiiheivehuvvon.

Etáhtagaskasaš ovttasbargu
Individuála plánaid ráhkadeapmái gáibiduvvo ahte iešguđet hálddašandásit ja iešguđet etáhtat ja ossodagat ovttasbarget. Njuolggadusa mielde lea suohkana sosiálabálvalusas geatnegasvuohta ovttasbargat eará bálvalusaiguin plána ráhkadeami oktavuođas. Oktan eaktun lea ahte ráhkaduvvo oktasaš individuála plána mii gokčá bálvalusaid suohkandearvvašvuođabálvalusalága, spesiálistadearvvašvuođalága, psyhkalaš dearvvašvuođa-suodjalanlága ja sosiálabálvaluslága mielde. Maiddái eará etáhtat dego A-etáhta, Oadjoetáhta ja suohkana oahpahusossodat sáhttet váldot fárrui bargui.

Geavaheaddji lea dán plánabarggu váldoolmmoš, ja eaktuduvvo ahte son aktiivadit searvá plána hábmemii. Plánabarggu sáhttet máŋggat ásahusat álggahit. Don sáhtát váldit oktavuođa suohkana sosiálabálvalusain dahje dainna bálvalusain mainna lea eanemus oktavuohta, plánahábmema álggaheami hárrái.

Eará mearrádusat
Sosiáladepartemeanta áigu ráhkadit individuála plána láhkaásahusa mas dárkileappot čilgejuvvo geas lea vuoigatvuohta oažžut individuála plána, ja mii plána sisdoallu galgá leat.

 

Vuoigatvuohta oažžut dearvvašvuođabálvalusa individuála plána, lea guston dan rájes go divššohasvuoigatvuođaláhka fápmuibođii 2001:s. Dearvvašvuođadepartemeanta lea ráhkadan bagadusa individuála plánii.