Norggas lea juohkehaččas vuoigatvuohta oažžut gokčojuvvot dárbbašlaš goluid go šaddá mátkkoštit spesialistadearvvašvuođabálvalusa dikšuma oktavuođas. Nu lea maiddái daid dearvvašvuođabálvalusaid oktavuođas mat gullet álbmotoadjolága vuollái, namalassii mátkkiid ovddas bearašsuodjaluskantuvrraide ja dearvvašvuođastašuvnnaide.

Doarjja juolluduvvo dábálaččat mátkegoluid ovddas dušše lagamus báikái gos dearvvašvuođabálvalus addo, ja meroštallojuvvo dábálaččat hálbbimus almmolaš sáhtu meriid mielde. Jus gollu buhtaduvvo eará lága bokte, de massá vuoigatvuođa dán njuolggadusa olis.

Buhcciidsáhtu birra leat dárkilet njuolggadusat láhkaásahusa hámis.

 

Buhcciidsáhtu vuoigatvuohta lea čilgejuvvon divššohasvuoigatvuođalága §:s 2-6. Jus vuoigatvuohta ii ollašuva, de sáhtát váidit fylkka dearvvašvuođagehččui gos dearvvašvuođabálvalus galgá addojuvvot. Áigemearri dáhttut vuoigatvuođa ollašuvvat lea diššohasvuoigatvuođalága § 7-5 mielde, njealji vahkku sisa dan rájes go ožžot dahje livččet galgan oažžut dieđu vuoigatvuođa ollašuhttima birra lága § 7-1 vuođul.

Váidinriekti lea čilgejuvvon divššohasvuoigatvuođalága §:s 7-2.